Fram­kvæmda­stjórinn fær frí til að vera kylfu­sveinn

Bjarki Pétursson er framkvæmdastjóri GB, en Þorkell Már Einarsson, formaður klúbbsins sagði frá því í skilaboðum til félagsmanna á miðlum GB að framkvæmdastjórinn væri farinn til Bandaríkjanna til að vera kylfusveinn Gunnlaugs Árna Sveinssonar á US Amateur Championship.

„Golfsamband Íslands óskaði eftir leyfi stjórnar GB til að fá Bjarka lausan í þetta verkefni. Svona tækifæri koma sjaldan á lífsleiðinni og því fannst stjórn ekkert sjálfsagðra en að hleypa Bjarka vestur um haf í þetta spennandi mót. Við óskum þeim félögum góðs gengis,“ skrifaði Þorkell.

Þetta þýðir jafnframt að stjórn Golfklúbbs Borgarness mun ganga í störf Bjarka á þessum tíma. Stjórnarsetan er sjálfboðaliðastarf og stjórnarmeðlimir eru í fullri vinnu samhliða, en þeir segjast ætla að leitast við því að svara öllum fyrirspurnum við fyrsta tækifæri.

Gunnlaugur Árni Sveinsson er tæplega tvítugur kylfingur sem er nú þegar búinn að blanda sér í hóp bestu kylfinga Íslands.

Hann varð fimmti á Íslandsmótinu í fyrra, þá átján ára gamall. Síðasta haust settist hann á skólabekk í Louisana State háskólanum í í Bandaríkjunum. Hann var þar á skólastyrk í gegnum golfið og góð frammistaða hans í vetur tryggði honum keppnisrétt á úrtökumóti fyrir Opna bandaríska risamótið.

Gunnlaugur var ekki langt frá því að tryggja sig inn á þetta eina af fjórum risamótum golfsins en hann var í öðru sæti að loknum fyrri keppnisdegi. Honum tókst ekki að fylgja því eftir og komst ekki á mótið. 

Gunnlaugur komst aftur á móti inn á Opna áhugameistaramótið þar sem einnig verður hörð keppni.

Það verður því fróðlegt að fylgjast með samstarfi Gunnlaugs og Bjarka á Opna áhugameistaramótinu sem fer fram hjá Ólympíuklúbbnum í San Francisco í Kaliforníu fylki frá 11. til 17. ágúst næstkomandi.