Að takast á við sjokkerandi breytingar í vinnunni

Samt eru breytingar í atvinnulífinu hinn eðlilegasti hlutur og í raun nauðsynlegur fyrir alla framþróun.

Þegar við tökumst á við miklar breytingar, er hins vegar mikilvægt fyrir okkur að vita að breytingum getur fylgt ákveðinn tilfinningarússibani. 

Sem þýðir að okkur getur liðið alls konar í kjölfarið. 

Sumir fara í mikið uppnám, aðrir minna, enginn er eins.

Sumum líður skringilega í langan tíma, öðrum í aðeins nokkra daga.

Því já; Það er enginn eins og engar reglur um hversu lengi eða fljót við eigum að vera að aðlagast breytingunum.

Það sem þó er einkennandi er að í kjölfar mikilla breytinga er algengt að fólk fari í gegnum það sem kallað eru sorgarstigin fimm.

Þessi fimm sorgarstig eru:

Afneitun, reiði, samningar, sorg og samþykki.

Í grein sem Atvinnulífið birti á tímum Covid, var hvert stig skýrt nánar.

En það sem þessar tilfinningar þýða eru einmitt alls konar tilfinningar; við getum upplifað uppnám, verið svekkt, pirruð, hálf reið, spennt, í tilhlökkun, óttaslegin og svo framvegis. Jafnvel allt þarna á milli.

Og það sem meira er: 

Við getum verið að upplifa margar ólíkar tilfinningar nánast á sama tíma, því sorgarstigin eru ekki þannig að þau komi til okkar í marvissri röð þar sem eitt tekur við af öðru; Stundum blandast allt saman.

Aðalmálið er að viðurkenna fyrir okkur hversu eðlilegt það er að okkur líði alls konar. Og bera virðingu fyrir því að okkur líður ekki öllum eins.

Það getur samt hjálpað okkur að kryfja tilfinningarnar okkar með því að máta þær við sorgarstigin fimm: Að vera svekkt og vonsvikin gæti verið það stig sem kallað er reiði og það að vera döpur og finna til söknuðar eða missis yfir einhverju er tegund af sorg.

Samþykki er hins vegar stigið sem við viljum komast á en það er þegar okkur finnst við loks vera orðin fullkomlega sátt og sæl með breytingarnar og öllu því sem þeim fylgja.

Þá geta alls kyns atriði hjálpað okkur í gegnum þennan rússibana tilfinninga; Til dæmis að vera dugleg að fá upplýsingar ef okkur finnst eitthvað óljóst, að reyna að vera jákvæð og trúa því að breytingunum fylgi ýmiss frábær tækifæri og að ræða við fólkið sem stendur okkur næst um það hvernig okkur líður.

Til dæmis okkar besta vin í vinnunni.