„Stress og spenningur að flytja einn út og þurfa læra á upp­þvotta­vél“

Hinn nítján ára Reynir Þór hefur skrifað undir þriggja ára samning við þýska toppliðið Melsungen. Liðið var í baráttunni um þýska meistaratitilinn alveg fram í næstsíðustu umferð þegar það tapaði fyrir Füchse Berlin. Reynir varð bæði Íslands og bikarmeistari með Fram á síðasta tímabili og lék sinn fyrsta A-landsleik á dögunum.

„Þetta leggst bara vel í mig. Smá svona stress og spenningur að flytja einn út og þurfa læra á uppþvottavél og svona,“ segir Reynir léttur.

„Mér finnst ég vera tilbúinn en ég held að þeim sé alveg sama í þýsku deildinni að maður hafi verið eitthvað góður á Íslandi. Maður er bara að fara beint í djúpu laugina og þetta er risastórt tækifæri fyrir mig að sýna mig og verða betri.“

Elvar Örn Jónsson mun yfirgefa Melsungen í sumar og ganga til liðs fyrir Magdeburg. Arnar Freyr Arnarsson er einnig á mála hjá félaginu.

„Ég hringdi í Arnar og Elvar og þeir höfðu bara góða hluti um þetta að segja. En þetta er allt öðruvísi umhverfi þarna og þetta er bara vinna. Það verður markmiðið mitt að verða betri, komast í landsliðið og komast í byrjunarliðið hjá Melsungen.“

Hér að ofan má sjá viðtalið við Reyni sem var í Sportpakkanum í gærkvöldi.