Gera fjöl­margar breytingar á kíló­metra­gjaldinu

Ný lög um kílómetragjald ættu samkvæmt frumvarpi að taka gildi næstu mánaðamót. Þá myndi olíugjald falla niður og um leið bensínverð lækka, en gjaldið hefur verið innheimt í gegnum olíufélögin. Þess í stað munu ökutækjaeigendur sjálfir skrá kílómetrastöðu á akstursmæli og greiða í ríkissjóð fyrir hvern ekinn kílómetra.

Þrír mánuðir eru síðan frumvarpið fór í gegnum fyrstu umræðu og var því næst vísað til efnahags- og viðskiptanefndar. Þar hefur það setið síðan, og á eftir að fara í gegnum tvær umræður á þinginu áður en það verður að lögum.

Arna Lára Jónsdóttir, formaður efnahags- og viðskiptanefndar, segir frumvarpið hafa verið afgreitt úr nefndinni í vikunni.

„Þetta er bara núna í yfirlestri hjá nefndarsviði. Fer væntanlega á dagskrá þingsins í dag eða á morgun. Bara um leið og þeim yfirlestri lýkur,“ segir Arna Lára. 

Gerið þið miklar breytingar á frumvarpinu?

„Já, við erum að leggja til þónokkrar breytingar. Þetta er auðvitað ofboðslega stór kerfisbreyting og við erum búin að liggja yfir þessu. Við fengum fjölmargar umsagnir sem okkur þótti rétt að taka tillit til. Þannig við erum að gera töluvert margar breytingar, ekki á meginefni frumvarpsins, en við erum að leggja til allskonar minniháttar breytingar á frumvarpinu,“ segir Arna Lára, en vildi ekki fara nánar út í breytingarnar. Þær muni koma í ljós þegar þær verða birtar á vef þingsins. 

Hún segir nefndina leggja til að gildistöku frumvarpsins verði frestað. 

„Þetta var líka lagt fram á síðasta þingi og það er búið að taka gagngerum og góðum breytingum að mínu mati. Ég er að vona að við náum að klára þetta, ég bind miklar vonir við það,“ segir Arna Lára. 

Hún vonast til þess að breytingarnar verði til að meiri sátt ríki um frumvarpið, en það hefur þótt heldur umdeilt.

„Það er aldrei vinsælt að tala um tekjur hins opinbera og ríkisins. Ég vona að fyrir flesta verði þetta breyting til góðs. Það er mikil nauðsyn að taka upp þetta kerfi, það vantar tekjur hjá ríkinu til að standa að viðhaldi vega og það erum við öll sammála um. Það er mikil nauðsyn að samþykkja þetta frumvarp,“ segir Arna Lára. 

Rangt var haft eftir Örnu Láru í upphaflegri útgáfu fréttarinnar, og sagt að hún væri vongóð um að frumvarpið yrði að lögum 1. júlí næstkomandi. Rétt er að nefndin hefur lagt til að gildistökunni verði frestað.