Bana­slysið haft á­hrif á undir­búning mann­gerðra íshella

Til stendur að hefja framkvæmdir að tveimur manngerðum íshellum á Langjökli á næstu misserum. Bláskógabyggð mun gera samning við forsætisráðuneytið um nýtingu á þjóðlendu að loknu deiliskipulagsferli og verkefnið auglýst áður en sveitarfélagið gerir samning við fyrirtæki um ferðaþjónustu á svæðinu.

Í umsögn forsætisráðuneytisins um fyrirhugaða íshelli eru gerðar ýmsar athugasemdir við verkefnið. 

Meðal annars er brýnt fyrir sveitarfélaginu að gera áhættumat vegna náttúruvára og ítrekaðar tillögur starfshóps sem var myndaður vegna banaslyss í íshelli í Breiðamerkurjökli á síðasta ári. Að sögn sveitarstjóra verður gerð krafa um ýmis öryggisatriði í væntanlegum samningi við ferðaþjónustuaðila.

„Þeir þurfa að sína fram á það að þeir séu með áætlanir, með kerfi í kringum þetta og kunni að bregðast við og viti hvað skal gera. og geti metið aðstæður og áhættu á hverjum tíma,“ segir Ásta Stefánsdóttir, sveitarstjóri Bláskógabyggðar.

Meiri kröfur eftir slysið í Breiðamerkurjökli

Banaslysið á síðasta ári hafi haft töluverð áhrif á undirbúningsvinnuna í Langjökli og lærdómur dreginn frá mistökum sem þar voru gerð.

„Þetta hægði á þessari vinnu og þessi mál voru komin í vinnslu áður en það varð. Það var ákveðið að stoppa og var fundað og farið yfir hvaða kröfur ætti að gera og það er verið að gera meiri kröfur en var gert ráð fyrir áður,“ segir Ásta.

Ekki er útilokað að hafa íshellana opna á sumrin enda væntanlegir hellar í Langjökli annars eðlis en náttúrulegir íshellar. Það sé ferðaþjónustuaðila að meta hvort bráðnun á sumrin reynist of mikil.

„Þetta eru auðvitað ekki hellar sem eru að taka svona miklum breytingum eins og þessir náttúrulegu íshellar sem að myndast bara við bráðnun heldur er þetta bara borað eða grafið ofan í jökullinn svo þetta er ekki á eins mikilli hreyfingu,“ segir Ásta.

„Það eru engin vatnsföll sem eru að streyma þarna undan þessum hellum.“