Á­fengi og íþróttaviðburðir geti átt sam­leið sé farið að lögum

Áfengissala á íþróttaviðburðum hefur margfaldast á undanförnum árum. Lögreglan hyggst hafa aukið eftirlit með sölu áfengis á slíkum viðburðum þar sem dæmi eru um að skort hafi leyfi. Íþrótta- og ólympíusamband Íslands samþykkti á þingi sínu á dögunum að taka forystu í að móta traustari umgjörð um áfengisveitingar á íþróttaviðburðum og draga úr sýnileika og aðgengi sérstaklega þegar börn og fjölskyldur eru viðstödd.

Verði að finna hinn gullna meðalveg

Willum Þór Þórsson, nýr formaður ÍSÍ, segist sjálfur trúa því að íþróttir og áfengi eigi ekki samleið en að áfengisveitingar tengdar íþróttaviðburðum geti farið saman að því gefnu að farið sé að landslögum. Mikil umræða hefur sprottið upp í kringum málið en íþróttahreyfingin segir þennan nýja tekjustofn félaganna mikilvægan rekstrinum.

„Á íþróttaviðburðum gengur ekki upp en tengt íþróttaviðburðum verður bara að fylgja landslögum. Ég hef nú farið víða núna og á viðburði þar sem þetta hefur verið. Þetta er bara ágætlega aðgreint og það er mjög mikilvægt,“ segir Willum Þór í viðtali í Reykjavík síðdegis í dag.

„Það verður einhvern veginn að finna þennan gullna meðalveg vegna þess að vð gætum aldrei verið að setja neinar sérreglur sem íþróttahreyfing. Ég vil líka tala um forvarnarsamtök. Við þurfum að ná umgjörð um þetta með forvarnir barna og unglinga í huga,“ segir hann.

Víða í Evrópu eru takmarkanir á áfengisveitingum á íþróttaviðburðum. Nærtækasta dæmið er eflaust leikir í ensku úrvalsdeildinni en það er áfengi til sölu á afmörkuðum svæðum og aðeins fyrir leik og í hálfleik. Ekki má fara með veigarnar í stúkuna þar sem börn og unglingar eru.

Tekjurnar skipti félögin máli

Fréttastofa tók á dögunum hús á Blikum en á Kópavogsvelli gilda svipaðar reglur. Áfengar veitingar eru seldar fyrir leik og í hálfleik. Flosi Eiríksson, formaður stjórnar knattspyrnudeildar Breiðabliks, segir félagið fyrst og fremst hafa byrjað að selja áfengi á viðburðum til að bæta upplifun gesta en að það hafi einnig orðið mikilvægur tekjustofn.

„Við reynum að gera þetta í samræmi við öll þau lög og reglur sem í landinu gilda og verklagsreglur sem félagið hefur sett sér og Kópavogsbær hefur yfirfarið. Við seljum hér bjór og léttvín í sérgreindu rými sem við köllum Grænu stofuna þar sem fullorðið fólk afgreiðir á barnum og við viljum að það sé aðallega fullorðið fólk sem sé þar inni. Við byrjuðum á þessu fyrir fjórum árum til að bæta upplifunina, menn kæmu aðeins fyrr, hittast fá sér einn bjór fyrir leikinn eða í hálfleik og það var svona okkar meginhugmynd. Við seljum bara bjór fyrir leik eða í hálfleik, við seljum ekki á meðan leik stendur svo það sé ekki þetta ráp. Við seljum ekki bjór eftir leik, nema þegar við verðum Íslandsmeistarar kannski,“ segir hann.

Flosi segir tekjurnar af áfengissölu búbót fyrir öll íþróttafélög landsins.

„Þetta skiptir alveg máli. Útgangspunkturinn var að bæta upplifunina og að það verði meira gaman að koma hingað en þetta eru alveg tekjur sem skipta okkur sem og öll önnur félög sem eru í þessu máli. Það er ekkert launungarmál að það þarf að hafa öll tól og tæki úti til þess að reka íþróttafélög eða knattspyrnudeildir eins og Breiðabliks,“ segir Flosi Eiríksson, formaður stjórnar knattspyrnudeildar Breiðabliks.