Reiknar ekki með Shaq í odda­leiknum í Síkinu: „Vesen með nýrun“

Rom­bl­ey þurfti þurfti að fara af velli í öðrum leik­hluta í leik Stjörnunnar og Tindastóls í úr­slitum Bónus-deildarinnar sem lauk með sigri Stjörnunnar sem með því knúði fram oddaleik. 

Rom­bl­ey var í kjölfarið fluttur á sjúkra­hús eftir að hafa fengið læknisað­stoð í Ás­garði. Í hálfleik voru áhorfendur beðnir um að gefa sjúkraflutningamönnum pláss til að athafna sig og áhorfendur sendir út um útgang á bakhlið Ásgarðs.

Rombley hafði átt í öndunar­erfið­leikum yfir daginn en við skoðun í gær komu í ljós ein­hver vand­kvæði í tengslum við nýru hans og gengst hann undir frekari rannsóknir í dag.

„Ég fór og hitti hann í gær eftir leikinn,“ segir Baldur Þór Ragnarsson, þjálfari Stjörnunnar í sam­tali við Vísi. „Það er ein­hvers konar vesen með nýrun hjá honum og hann er bara í rannsóknum í dag. Það voru ein­hver gildi sem voru ekki nógu góð í tengslum við nýrum. Ég svo sem er ekki læknir og get ekki upp­lýst þetta eitt­hvað meira en það.“

Rom­bl­ey hafi verið brattur þrátt fyrir allt.

„Hann var góður, jákvæður þrátt fyrir það sem á undan hafði gengið.“

Stutt er á milli leikja í úr­slita­ein­víginu og odda­leikurinn um Ís­lands­meistara­titilinn fer fram í Síkinu á mið­viku­daginn.

Ertu að gera ráð fyrir honum í odda­leiknum?

„Eins og staðan er núna gera ég ekki ráð fyrir honum. Ef hann verður með þá er það bara bónus.“

Aðrir þurfa að stíga upp líkt og var raunin í leik fjögur í gær þar sem að Stjörnu­menn náðu að vinna sig aftur inn í leikinn án Rom­bl­ey og sigla heim sigri eftir að hafa verið undir lengi vel.

„Það er karakter í þessu liði, Bjarni og Viktor áttu góða inn­komu og sömu­leiðis Hlynur. Þetta eru bara menn sem þurfa að stíga upp og fylla hans skarð.“

Odda­leikur fram­undan, fjórða árið í röð sem það er raunin í úr­slita­ein­vígi efstu deildar karla.

„Bara gleði og gaman. Það er ekkert annað, gaman að taka þátt í þessu. Þetta verður bara leikur fimm, leðju­slagur.“

Baldur er búinn að fara yfir leik gærkvöldsins.

„Ég fór yfir leikinn þegar að ég kom heim og sofnaði um tvö leitið. Ég er ánægður með það hvað menn héldu fókus og voru ekki að fara yfir um þrátt fyrir að Stólarnir hafi átt góðan kafla. Vel gert hjá þeim að halda sér inn í hlutunum.“

Oddaleikur Tindastóls og Stjörnunnar í úrslitaeinvígi Bónus deildar karla í körfubolta fer fram í Síkinu á Sauðárkróki á miðvikudaginn kemur. Leikurinn hefst klukkan átta og verður sýndur í beinni útsendingu á Stöð 2 Sport.