Veiðir hrefnu í sumar og selur kjötið á Ís­landi

„Við höfum leyfi til hrefnuveiði við strendur Íslands, og þar með talið Ísafjarðardjúp,“ segir Gunnar í samtali við fréttastofu. Leyfið er gefið út til fimm ára og framlengist árlega um eitt ár. Heimilt er að flytja allt að 20 prósent af veiðiheimildum hvers árs yfir á næsta ár.

Fjallað var um það í frétt RÚV í gær að Samtök ferðaþjónustunnar og Hvalaskoðunarsamtök Íslands hafi sent tillögu til ráðherra um að Ísafjarðardjúp verði skilgreint sem griðasvæði hvala. Gunnar segist hafa séð þessar fréttir. Hann muni veiða við Ísafjarðardjúp í sumar, sem og annars staðar.

Hrefna ekki veidd frá 2021

Hafrannsóknastofnun hefur lagt til að árlegar veiðar hrefnu árin 2018 til 2025 nemi ekki meira en 217 dýrum. Árið 2018 hafi sex hrefnur verið veiddar við Ísland og árið 2021 hafi ein hrefna verið veidd.

„Við byrjum á einni. Það er ein í einu,“ segir Gunnar.

Eftir að Kristján Loftsson, framkvæmdastjóri Hvals hf., greindi frá því í upphafi mánaðar að hann ætlaði ekki að veiða langreyð er Gunnar sá eini sem er með gilt leyfi til veiða. Gunnar segir ekki útilokað að fleiri sæki um leyfi til hrefnuveiða.

„Það er hugsanlegt. Þeir sem hafa áhuga geta sótt um leyfi.“

Selur hrefnuna á innlendan markað

Gunnar segir nokkra eftirspurn eftir hrefnukjöti og hann horfi til innlends markaðar.

„Það er hugmyndin,“ segir hann um að selja hrefnuna hér.

Spurður hvort hann sé stressaður fyrir mótmælum vegna veiðanna segist Gunnar ekki búast við mikilli andstöðu við þeim en viðurkennir þó að það séu skiptar skoðanir.

Gunnar vill ekki fara út í það hvernig hrefnurnar eru veiddar. Það sé sama aðferð og í gegnum tíðina.

„Það eru miklar kröfur gerðar til veiðanna og það er lykilatriði að hafa velferð dýranna í huga. Það eru mjög miklar kröfur gerðar til okkar,“ segir hann og að það gildi til dæmis um aflífunartímann og að hann sé stuttur.

„Veiðarnar hefjast í sumar og það er hrefna við strendur landsins langt fram á haust.“

Spenna fyrir vestan

Gunnar gerir út frá Ísafjarðarbæ.

„Við erum í mjög góðu sambandi við fólkið á svæðinu. Ég finn fyrir mjög miklum velvilja á Ísafirði og það er mikill spenningur meðal Vestfirðinga að fá hrefnukjöt í sumar.“