Finnur sig vel í hörkunni á Eng­landi: „Orðinn full­orðinn maður núna“

Benoný skoraði jöfnunarmark Stockport gegn Northampton Town á þriðjudaginn, níu mínútum eftir að hafa komið inn á sem varamaður. 

Í leiknum þar á undan skoraði hann bæði mörk Stockport í 2-1 sigri á Blackpool. Hann kom inn á sem varamaður í hálfleik, jafnaði í 1-1 á 47. mínútu og skoraði svo sigurmark Stockport níu mínútum fyrir leikslok. Þetta voru hans fyrstu mörk fyrir enska félagið. Hann gekk í raðir þess um áramótin eftir að hafa bætt markametið í efstu deild á Íslandi í fyrra.

„Þetta hefur verið fínt. Það er mikill munur á að vera úti hérna á Englandi eða heima á Íslandi. En þetta er geggjað umhverfi og gott að vera kominn í svona sterkt umhverfi og það gengur virkilega vel að aðlagast þannig ég er bara sáttur,“ sagði Benoný í samtali við íþróttadeild.

Hann er ekki ókunnur atvinnumennsku því hann var í tvö ár á mála hjá Bologna á Ítalíu og lék þá með yngri liðum félagsins. Benoný segist búa að þeirri reynslu.

„Hún hjálpar allan daginn. Ég kannast aðeins við þetta eftir að hafa verið úti á Ítalíu. Ég var auðvitað yngri þá og það er öðruvísi að vera á Ítalíu en Englandi sem er líkara Íslandi. En ég er orðinn fullorðinn maður núna og þetta er allt annað,“ sagði Benoný sem býr í miðborg Manchester.

Ennþá betra að skora fyrir framan stuðningsmennina

Benoný segir að það hafi verið ánægjulegt að kynna sig almennilega fyrir stuðningsmönnum Stockport, í leiknum gegn Blackpool á Edgeley Park.

„Tilfinningin var fáránlega góð. Fyrri hálfleikurinn var mjög lélegur og við vorum 0-1 undir. Síðan var ég settur inn á og ég ætlaði að koma inn á og reyna að skora. Ég er glaður að hafa skorað eitt en það var ennþá betra að hafa náð þessu sigurmarki, og ennþá betra fyrir framan stuðningsmennina. Þetta var mjög góð tilfinning,“ sagði Benoný sem mætti fullur sjálfstrausts í leikinn gegn Northampton, eftir mörkin tvö gegn Blackpool.

„Ég fann það þegar ég kom inn á á þriðjudaginn að ég var rólegur með boltann og þetta var þægilegra inni á vellinum. Þegar boltinn kom inn á teiginn var maður alltaf klár. Það er gott að vera kominn með smá sjálfstraust aftur. Þessi mörk gerðu mjög mikið. Maður er enn að aðlagast og að hafa náð þessum mörkum gerði helling,“ bætti Benoný við.

Stockport mætir Charlton Athletic í dag og Benóný leyfir sér að vonast eftir sæti í byrjunarliðinu.

„Það er bara undir þjálfaranum komið. Ég er enn að reyna að koma mér betur inn í þetta. Þótt ég sé að skora mörk er fullt annað á bak við fótboltann. Ég er að aðlagast betur og þetta verður bara að koma í ljós,“ sagði Benoný.

Félag í sókn

Mikill uppgangur hefur verið hjá Stockport undanfarin ár. Liðið féll úr deildakeppninni 2011 en sneri aftur þangað ellefu árum seinna. Stockport vann sér svo sæti í C-deildinni í fyrra og hefur gengið vel á þessu tímabili.

„Þetta er félag sem er á mikilli uppleið. Það er búið að vinna mikið síðustu ár og það er stutt síðan það var í neðri deildum. Það er kominn mikill peningur inn í félagið, nýr eigandi og þeir eru vanir því að vinna mikið núna og við ætlum að halda því áfram. Þetta er að verða stærra og stærra félag,“ sagði Benoný.

Horfir á 2. sætið

Stockport er sem stendur í 4. sæti C-deildarinnar. Tvö efstu liðin fara beint upp í B-deildinni en liðin í sætum 3-6 fara í umspil um síðasta sætið sem í boði er.

„Ég held að flestir, allavega ég, séu að horfa á 2. sætið en auðvitað er umspilið alltaf þangað sem við viljum fara,“ sagði Benoný en Stockport er sex stigum á eftir Wycombe Wanderers sem er í 2. sætinu.

Klár í hörkuna

Benóný segir að fótboltinn í C-deildinni sé harður og leikstíllinn sé beinskeyttur.

„Það er mikil harka. Þetta er mjög harður fótbolti og það er gott að vera kominn í alvöru fótbolta hérna. Það kunna allir fótbolta hérna. Þetta er frekar einfaldur fótbolti; stundum bara sparkað fram og vonast eftir því besta en stundum er spilað,“ sagði Benoný sem segist hafa verið tilbúinn í hörku enska neðri deildanna.

„Já, mér fannst það. Ég er enn að aðlagast en ég myndi segja að ég hafi verið klár áður en ég kom út og reyni núna að koma mér ennþá betur inn í þetta,“ sagði Benoný.

A-landsliðssæti plús

Framundan eru leikir hjá íslenska landsliðinu gegn Kósóvó um áframhaldandi sæti í B-deild Þjóðadeildarinnar. Benoný myndi ekki slá hendinni á móti sæti í A-landsliðinu en er annars meira en klár að spila fyrir U-21 árs landsliðið á sama tíma.

„Það er erfitt að segja. Það er U-21 árs verkefni á sama tíma. Þeir vilja mikið fá mig þar þannig ég er fyrst og fremst að horfa þangað. En ef hitt kemur er það bara mikill plús,“ sagði Benoný að lokum.