Hafa ekki tapað undan­úr­slita­leik í ní­tján ár

ÍBV mætir Stjörnunni í fyrri undanúrslitaleiknum í dag en leikurinn hefst klukkan 18.00. Bikarúrslitin fara fram á Ásvöllum í ár en ekki í Laugardalshöllinni.

Eyjamenn hafa verið mikið bikarlið í handboltanum í gegnum tíðina og hafa fjórum sinnum orðið bikarmeistarar. Það er líka orðið mjög langt síðan þeir töpuðu undanúrslitaleik í bikarkeppni karla í handbolta.

Það voru einmitt Stjörnumenn sem voru þeir síðustu til að vinna undanúrslitaleik á móti ÍBV í bikarkeppni karla í handbolta.

Stjarnan vann fjögurra marka sigur í undanúrslitaleik liðanna í febrúar 2006, 36-32, eða fyrir meira en nítján árum síðan. Patrekur Jóhannesson var langmarkahæstur í liði Stjörnunnar í leiknum með ellefu mörk en í marki Eyjamanna stóð þá Björgvin Páll Gústavsson.

Eyjamenn hafa unnið alla fjóra undanúrslitaleiki sína síðan þá og þeir hafa reyndar allir verið á móti Haukum. ÍBV tapaði á móti Haukum í bikarkeppninni í vetur en komst áfram á kæru.

Eyjamenn urðu síðast bikarmeistarar fyrir fimm árum eftir einmitt sigur á Stjörnumönnum í úrslitaleik. Þeir komust alla leið í úrslitaleikinn í fyrra en töpuðu þá stórt á móti Valsmönnum í Laugardalshöllinni.

Stjarnan hefur á móti tapað í undanúrslitum tvö síðustu ár og alls þrisvar sinnum á síðustu fjórum árum. Liðið vann síðast bikarmeistaratitilinn fyrir átján árum, árið 2007.

Hinn undanúrslitaleikurinn í kvöld er á milli Fram og Aftureldingar og hefst hann klukkan 20.15. Framliðið hefur ekki orðið bikarmeistari í aldarfjórðung, unnu í fyrsta og eina skiptið árið 2000, en Mosfellingar urðu bikarmeistarar fyrir tveimur árum þá í annað skiptið.