Martin: „Fór rosa­lega fyrir brjóstið á mér að heyra það“

Ísland tryggði sér sæti á Evrópumótinu í körfubolta í sumar með 83-71 sigri gegn Tyrklandi í lokaleik undankeppninnar. Liðið þurfti sigur til að tryggja EM-sætið og kláraði verkefnið með stæl gegn gríðarsterku tyrknesku liði.

„Það var lítið sofið nóttina eftir leik. Spennu­fallið svaka­legt,“ segir Martin í sam­tali við íþrótta­deild. „Allur undir­búningurinn sem fór í þennan leik, bæði líkam­lega og and­lega, er búinn að vera mikill. Það er langt síðan að það var svona mikill fiðringur hjá mér persónu­lega fyrir ein­hverjum leik. Þegar að svona mikið er undir nær maður ekki að hugsa um neitt annað. Á sama tíma er ég að koma heim í þrjá daga, hitta fjöl­skyldu og vini og reyna að vera alls staðar. Það er búið að vera mikið álag síðustu daga en það var þungu fargi af mér létt í gær. Ég get alveg viður­kennt það. Nú er bara spenningur fyrir sumrinu.“

Hann muni ekki eftir því að hafa spilað lands­leik þar sem að fólk var byrjað að mæta á undan honum og liðinu í höllina. 

„Mér fannst það rosa­lega sér­stakt og skemmti­legt á sama tíma. Það ýtti enn meira undir kvíðann og stressið en þetta var bara magnað móment í gær. Þetta var ein­hver skemmti­legasti leikur sem ég hef tekið þátt í. Allt í kringum leikinn, leikurinn sjálfur, að gera þetta með mörgum af mínum bestu vinum og fyrir framan fjöl­skylduna. Mamma og pabbi höfðu heldur ekki séð mig spila í langan tíma. Þetta var ein stór gleði­stund. Eitt­hvað sem mun gefa mér gæsa­húð um ókomin ár, maður mun líta til baka með miklu stolti og gott að eiga þennan leik í vasanum þegar að strákarnir mínir fara að spyrja hvort ég hafi getað eitt­hvað í gamla daga.“

Fullkomið öskubuskuævintýri

Hann á erfitt með að lýsa sigurstundinni. 

„Þessum leik og þessu öllu. Þetta er eitt­hvað ösku­buskuævintýri sem var skrifað full­kom­lega. Allur undir­búningurinn fyrir leik, allir leikirnir sem við spiluðum í þessari undan­keppni voru bara frábærir. Þetta er það skemmti­legasta sem maður gerir og við eigum þetta svo skilið líka. Ég vona að fólk átti sig á allri vinnunni sem við erum búnir að leggja í þetta. Við vorum grát­lega nálægt því að fara á HM síðast. Liðið á þetta skilið. Við erum að upp­skera eins og við höfum sáð.“

Stóðu við stóru orðin

Ís­land með lið á stór­móti í körfu­bolta í fyrsta sinn síðan árið 2017. Eftir tap gegn Ung­verja­landi í næstsíðustu um­ferð undan­keppninnar sýndu strákarnir okkar mátt sinn og megin gegn Tyrk­landi þegar allt var undir. Um­ræðan um liðið sem spratt upp eftir tapið gegn Ung­verjum, þar sem að sigur hefði tryggt EM sætið fyrir loka­um­ferðina, fór fyrir brjóstið á Martin.

„Ég heyrði það eftir leikinn gegn Ung­verja­landi að fólk talaði um að þegar að við þurftum að skila inn úr­slitum, þegar að pressan væri á okkur, þá næðum við ekki að sýna það. Það fór rosa­lega fyrir brjóstið á mér að heyra það. Að fólk væri að tala um það hingað og þangað að við værum ekki nógu and­lega sterkir eða góðir í að klára leiki þegar að við þurftum að klára þá. Ég held að við höfum staðið við öll stóru orðin í gær. Sýnt hvað við erum ógeðs­lega góðir í körfu­bolta. Hvað við erum gott lið og hvað allir eru að berjast fyrir hvorn annan. Maður er eigin­lega bara smá orð­laus og svífandi um á bleiku skýi.“

Martin er ekki alveg búinn að átta sig á því hvaða áfanga landsliðið var að ná. 

„Ég held að það komi með tímanum á næstu dögum þegar að maður nær að anda meira og léttar. Síminn er búinn að vera á fullu. Ótrú­legasta fólk sem maður er búinn að vera að knúsa. Maður finnur að fólk er spennt fyrir þessu. Finnur hvað það er mikil orka og áhugi á körfu­bolta akkúrat núna. Það er það sem við viljum. Fyrir mér er þetta skemmti­legasta íþrótt í heimi og vonandi erum við að sýna fleirum það. Sem Ís­lendingur viltu eiga lið í stærstu íþróttunum á stór­móti. Það var allt og langt liðið síðan að við vorum þar síðast. Ég hugsa að fólk sé byrjað að safna fyrir miða. Þú vilt ekki missa af þessu.“