Ærin verk­efni næstu ár

Landsvirkjun hefur nú hafist handa við gerð Hvammsvirkjunar í Þjórsá og byggingu vindorkuversins Búrfellslundar við Vaðöldu. Miklar framkvæmdir verða í Rangárþingi ytra og Skeiða- og Gnúpverjahreppi næstu árin og íbúar nágrannasveitarfélaga þeirra verða einnig varir við ýmsar framkvæmdir og flutninga. Vindmyllurnar sjálfar rísa á árunum 2026 og 2027 og verða fyrstu vindmyllur gangsettar síðla sumars 2026. Þá er áætlað að hefja stækkun Sigölduvirkjunar næsta vor en henni á að vera lokið haustið 2028. Gangi allt að óskum verður Hvammsvirkjun gangsett undir lok árs 2029.

Við hjá Landsvirkjun hittum íbúa Rangárþings ytra og Skeiða- og Gnúpverjahrepps á tveimur fundum nú í vikunni til að fara yfir næstu skref og við hverju megi búast á svæðinu. Fundirnir voru vel sóttir, við fengum tækifæri til að varpa ljósi á framkvæmdirnar og íbúarnir að leita frekari upplýsinga og skýringa. Við ætlum okkur að veita ítarlegar upplýsingar jafn óðum, eftir því sem framkvæmdum vindur fram. Allar nýjustu fréttir af gangi mála verða raktar á vefsíðunum hvammsvirkjun.is og burfellslundur.is.

Nýir vegir og brýr

Af framkvæmdum má fyrst nefna vega- og brúargerð Vegagerðarinnar sem samfélagið hefur lengi beðið eftir. Nýr 8 km langur Búðafossvegur verður lagður frá Landvegi að Þjórsárdalsvegi með rúmlega 200 metra langri brú yfir Þjórsá. Efni úr væntanlegum frárennslisskurði Hvammsvirkjunar verður nýtt til vegagerðarinnar. Þessi nýja leið gagnast okkur vel við framkvæmdir en mun einnig nýtast heimafólki um ókomin ár, enda styttir hún vegalengdir um tugi kílómetra milli efstu byggða Skeiða- og Gnúpverjahrepps að vestanverðu og Rangárþings ytra að austanverðu.

Á næsta ári áformum við hjá Landsvirkjun að leggja 3 km aðkomuveg inn á virkjunarsvæði Hvammsvirkjunar. ​Þá mun Vegagerðin einnig sjá um að færa og styrkja Þjórsárdalsveg og Gnúpverjaveg meðfram fyrirhuguðu Hagalóni og gera nýja brú yfir Þverá.​

Búrfellslundur kallar einnig á töluverðar vegaframkvæmdir​. Við þurfum að leggja um 22 km af vegslóðum innan framkvæmdasvæðisins til að tryggja aðkomu að sérhverri vindmyllu. Þá eru hafnar viðræður við Vegagerðina um þörf á styrkingu vega vegna flutninga á tækjabúnaði fyrir vindmyllurnar.

Um 250 ferðir með vindmyllur

Flutningar um þjóðvegi í tengslum við framkvæmdirnar verða gríðarmiklir.

Ef aðeins er litið til Búrfellslundar má geta þess að vindmyllurnar verða 28 talsins og 150 metrar að hæð þegar spaðar eru í hæstu stöðu. ​Hlutir í hverja vindmyllu verða fluttir með allt að tíu flutningabílum, á sérútbúnum vögnum sem verða fluttir til landsins. Lengsti farmurinn verður 70 metra spaðar og fara þarf 84 ferðir með þá. ​ Í heildina þarf yfir 250 ferðir til þess eins að koma vindmyllum inn á svæðið​. Þessir flutningar hefjast vorið 2026.​

650 manns á verkstað

Töluverðar jarðvegsframkvæmdir og mannvirkjagerð fylgja þessum virkjunum. Við munum reisa steypustöðvar á svæðinu til að koma í veg fyrir steypuflutninga um þjóðvegi.Við hvetjum verktaka til að nálgast framkvæmdir með lágmörkun kolefnisspors í huga og tökum mið af því við val á verktökum.

Framkvæmdir af þessum toga kalla á fjölda starfsfólks. Við gerum ráð fyrir að framkvæmdir við vindorkuverið nái hámarki 2026 og að þá verði allt að 150 manns á verkstað.

Framkvæmdir við Hvammsvirkjun verða enn umfangsmeiri. Á jörð okkar, Hvammi 3, verða reistar nýjar vinnubúðir og við reiknum með að þar verði 400 manns þegar flest verður árið 2027.

Framkvæmdir við stækkun Sigöldu hefjast á næsta ári​. Þær ná hámarki á árinu 2026 og gerum við ráð fyrir að þá verði um 100 manns á verkstað og hafi aðstöðu í vinnubúðum þar​.

Við ætlum að vanda okkur

Við hjá Landsvirkjun höfum unnið lengi að undirbúningi þessara stórframkvæmda á Þjórsársvæðinu. Íbúar munu verða varir við þessar framkvæmdir á næstu árum, hvort sem það er vegna flutninga um þjóðvegi með aðföng ýmiss konar, vélar og tæki, eða ferðalög starfsfólks til og frá vinnu.

Við kappkostum, nú sem fyrr, að leysa þetta verkefni af hendi á faglegan og ábyrgan hátt, með sem allra minnstu raski fyrir íbúa og umhverfi. Við ætlum að vanda okkur við hvert skref verklegra framkvæmda sem fram undan er, en ekki síður við að upplýsa íbúa sveitarfélaganna, og alla eigendur orkufyrirtækis þjóðarinnar, um framvindu mála.

Höfundur er framkvæmdastjóri Framkvæmda hjá Landsvirkjun.