Ótrúlega slakandi raftónlistarhátíð í fimmtánda skiptið

Oddur Ævar Gunnarsson skrifar 30. ágúst 2024 09:30

Það verður fjölbreyttur hópur listamanna á Extreme Chill Festival.

Tónlistarhátíðin Extreme Chill Festival fer fram í fimmtánda skiptið í Reykjavík í næstu viku. Pan Thorarensen hefur staðið að hátíðinni frá upphafi sem fyrst var haldin á Hellissandi við rætur Snæfellsjökuls, síðan í Berlín og svo loksins í Reykjavík.

„Þetta er í fimmtánda sinn sem við höldum þessa hátíð og við erum hvergi nærri af baki dottin,“ segir Pan í samtali við Vísi. Hátíðin hefst á mánudag 2. september og stendur yfir þar til á sunnudag 8. september. Í ár kemur fjölbreyttur hópur listamanna fram frá Íslandi sem og erlendis frá.

Hugmyndin að hátíðinni kviknaði hjá Pan og föður hans Óskari Thorarensen þegar þeir gerðu tónlist saman, svokallaða mixteip diska og kölluðu það Extreme Chill. Þeir skipuðu einmitt rafsveitina Stereo Hypnosis Ambient tríó á sínum tíma. Að sögn Pan hefur aldrei komið annað til greina en að halda í nafnið, jafnvel þó það sé oft mikið stuð í raftónlistinni. Margir upplifi hana einmitt slakandi.

Markmið hátíðarinnar er að kynna íslenska og erlenda hljóðlistamenn og tengja saman ólík listform, hljóðheim og lifandi myndheim. Hátíðin mun eiga sér stað á nokkrum mismunandi stöðum í miðborginni: Gamla Bíó, Mengi, Fríkirkjan í Reykjavík, White Lotus, Bíó Paradís, Smekkleysa, Radar, Kaffibarinn, 12 Tónar og Röntgen.

Tónlistarmenn sem verða á hátíðinni:

ALESSANDRO CORTINI

FUJI||||||||||TA

MARY LATTIMORE

ERALDO BERNOOCCHI & HOSHIKO YAMANE

MUSEUM OF SOUND (LISTENING ROOM WITH MIKA VAINIO)

CHRISTOPHER CHAPLIN

STEREO HYPNOSIS

MIXMASTER MORRIS

HARP & ARP

KIRA KIRA

ÆGIR