Ofurtölvan hefur litla trú á Rory McIlroy á Mastersmótinu

Scottie Scheffler, Rory McIlroy, Jon Rahm, Xander Schauffele og Jordan Spieth þykja samkvæmt veðbönkum sigurstranglegastir á Mastersmótinu í golfi sem hefst á fimmtudaginn.

Næstir á eftir þeim eru Joaquin Niemann, Hideki Matsuyama, Brooks Koepka, Viktor Hovland og Tony Finau.

Scheffler vann Mastersmótið fyrir tveimur árum og hefur verið efstur á heimslistanum frá því í mars 2022. Hann hefur unnið Players-mótið undanfarin tvö ár og hann fagnaði sigri á mótinu í síðasta mánuði.

SportsLine notar ofurtölvu forritið fyrir golfið og hún hefur verið að standa sig vel í spádómum sínum. Niðurstöðurnar eru þó ekki aðgengilegar nema að borga fyrir þær. Það má sjá niðurstöðurnar hér fyrir forvitna. CBS segir frá.

Ofurtölvan spáði meðal annars Jon Rahm sigri á Mastersmótinu í fyrra sem og að spá Scheffler sigri árið 2022.

Athygli vekur að ofurtölvan hefur litla trú á Rory McIlroy að þessu sinni en mikla trú á Justin Thomas.

McIlroy hefur unnið fjögur risamót á ferlinum og vantar bara sigur á Mastersmótinu til að loka hringnum. Hann er í öðru sæti á heimslistanum en hefur ekki byrjað árið vel. Besti árangur hans er nítjánda sætið á Playersmótinu. Ofurtölvan hefur ekki einu sinni trú á því að hann verði meðal fimm efstu.

McIlroy er vinsæll og á sér marga stuðningsmenn sem vilja ekkert frekar en að sjá hann loka hringnum og fá loksins á klæðast græna jakkanum.

Justin Thomas þykir ekki líklegur til sigurs hjá veðbönkunum en ofurtölvan hefur trú á því að hann muni vera í baráttunni um titilinn. Thomas er reynslumikill kylfingur og hefur verið meðal 25 efstu á sex af síðustu sjö Mastersmótum. Hann varð fjórði árið 2020 (hans besti árangur á Masters) og í áttunda sætinu árið 2022. Thomas hefur unnið tvo risamót á ferlinum en í bæði skiptin fagnaði hann sigri á PGA meistaramótinu.

Mastersmótið í golfi verður í beinni á Stöð 2 Sport 4. Útsending frá fyrsta degi hefst klukkan 18.30 á fimmtudaginn. Daginn áður verður sýnt frá Par 3 keppninni en útsendingin frá henni hefst klukkan 18.30 á miðvikudaginn.