Segist aldrei hafa unnið jafn ein­stakan titil

Liverpool lagði Chelsea 1-0 þökk sé marki fyrirliðans Virgil van Dijk undir lok framlengingar. Þetta var 10. titillinn sem Liverpool vinnur undir stjórn Klopp.

„Á mínum 20 árum þá er þetta án efa einstakasti titill sem ég hef unnið. Mér gæti ekki verið meira sama um arfleið mína. Ég kom ekki hingað til að búa hana til. Þetta var svo einstakt,“ sagði tilfinningaríkur Klopp í leikslok.

„Það sem átti sér stað hér var gjörsamlega bilað. Þessir hlutir eiga ekki að geta gengið upp,“ sagði Klopp en Liverpool var án leikmanna á borð við Mohamed Salah, Diogo Jota og Darwin Núñez í dag.

„Liðið, hópurinn, akademían er full af karakterum. Ég er svo stoltur af því að vera hluti af þessu í dag. Það bilaða er að við áttum þetta skilið. Við vorum heppnir, þeir voru heppnir. Strákarnir mættu til leiks, það var mjög svalt,“ sagði Klopp en alls tóku fimm leikmenn 20 ára eða yngri þátt í leiknum fyrir Liverpool í dag.

Fyrirliðinn, og markaskorarinn Van Dijk hrósaði ungu strákunum sömuleiðis í hástert eftir leik. Hann endaði viðtal sitt á að segjast ekki vilja segja of mikið en vonandi gæti félagið unnið nokkra titla viðbótar áður en Klopp stígur frá borði næsta sumar.