Þurfa lík­lega stóran sigur og að­stoð frá Afríku

Úrslitin í milliriðli 2 féllu ekki með Íslandi í gær og því er útilokað að liðið þurfi ekki einhvers konar aðstoð annarra við að komast inn í undankeppni ÓL.

Fimm marka sigur í dag gulltryggir að sú hjálp þurfi „aðeins“ að felast í því að Egyptaland verði Afríkumeistari á heimavelli á sunnudaginn, sem þykir mjög líklegt. Ef Egyptar komast ekki beint á ÓL með því að vinna mótið taka þeir sæti í undankeppni ÓL, á kostnað Evrópuþjóðar, vegna árangurs á síðasta HM.

Þetta vitum við fyrir leik Íslands og Austurríkis, þann fyrsta í lokaumferð milliriðils 1 í dag:

15+ marka sigur Íslands tryggir liðinu að lágmarki 4. sæti í milliriðlinum, og dugar til 3. sætis ef að Ungverjar tapa svo fyrir Frökkum. Ef að Ísland nær 3. sætinu er liðið öruggt um sæti í undankeppni ÓL, burtséð frá því hvort Egyptaland verður Afríkumeistari. Endi liðið í 4. sæti þarf það að treysta á Egypta.

5-14 marka sigur Íslands tryggir 4. sæti í milliriðlinum, yfir Austurríki, og Ísland þyrfti svo að treysta á að Egyptaland verði Afríkumeistari á heimavelli á sunnudaginn, sem þykir mjög líklegt.

1-4 marka sigur Íslands dugar ekki til að enda fyrir ofan Austurríki ef Ungverjar tapa svo fyrir Frökkum. Þá verða Ungverjaland, Austurríki og Ísland með 4 stig hvert, í 3.-5. sæti, en Ísland myndi enda neðst þeirra vegna átta marka tapsins gegn Ungverjum og Ólympíudraumurinn væri úti. Ef Ungverjar myndu hins vegar EKKI tapa fyrir Frökkum yrði Ísland fyrir ofan Austurríki og kæmist þá í undankeppni ÓL ef Egyptar yrðu Afríkumeistarar.

Jafntefli eða tap þýðir að Ólympíudraumurinn sé úti.

Egyptar á réttri braut

Á Afríkumótinu hafa Egyptar verið sannfærandi og spila í undanúrslitum geng Túnis á morgun. Í hinum undanúrslitaleiknum mætast Grænhöfðaeyjar og Alsír. Úrslitaleikurinn er á sunnudaginn.

EM gefur tvö sæti í undankeppni ÓL og eitt sæti á ÓL

Á EM eru sem sagt í boði tveir farseðlar inn í undankeppni Ólympíuleikanna. Liðin sem urðu í efstu átta sætunum á síðasta HM (Danmörk, Frakkland, Spánn, Svíþjóð, Þýskaland, Noregur, Egyptaland og Ungverjaland) eru komin inn í undankeppni ÓL, eða á leikana sjálfa, og því ekki að berjast um þessa farseðla.

Sigurvegari EM fær svo farseðil beint á ÓL. Heimsmeistarar Danmerkur og gestgjafar Frakklands eru komnir inn á ÓL, svo að ef þau lið spila til úrslita á EM fær liðið í 3. sæti farseðil á ÓL.

Barátta við Austurríki, Portúgal og kannski Slóveníu

Ísland hefur verið í baráttu við Austurríki í milliriðli 1, og við Portúgal í milliriðli 2, um farseðlana tvo í undankeppni ÓL. Slóvenía er hluti af þessari baráttu ef svo ólíklega fer að Egyptar verði ekki Afríkumeistarar (því þá taka Egyptar sæti í undankeppni ÓL en ekki Slóvenar sem urðu í 10. sæti á HM).

Eftir lokaumferðina í milliriðli 2 í gær getur Ísland ekki náð sama stigafjölda og Slóvenía og Portúgal náðu. Því er eina leiðin til að enda ofar en þau á mótinu sá langsótti möguleiki sem nefndur var að ofan, að Ísland endi í 3. sæti síns milliriðils. Þá myndi liðið spila um 5. sæti mótsins við Slóveníu, enda fyrir ofan Portúgal og Austurríki, og vera öruggt um sæti í undankeppni ÓL.

Ísland getur komið í veg fyrir fíaskó í kvöld 

Með sigri gegn Austurríki tryggir Ísland að liðin í undanúrslitum EM séu öll komin inn á ÓL eða í undankeppni ÓL, og þá væri Króatía endanlega örugg um sæti í undankeppni ÓL eftir að hafa náð 9. sæti á síðasta HM. Þar með yrði komið í veg fyrir það fíaskó að Króatar gætu grætt á tapi gegn Þýskalandi í kvöld, til að fleyta Þýskalandi upp fyrir Austurríki, eins og sumir hafa óttast. 

Eina leiðin til að Króatar missi af undankeppni ÓL er að Austurríki komist á ÓL sem Evrópumeistari (eða efsta lið á eftir Dönum og Frökkum) og Egyptar verði ekki Afríkumeistarar.

Hvað tekur við ef Ísland nær markmiðinu?

Ef Íslendingum verður að ósk sinni spila þeir í undankeppni Ólympíuleikanna sem fer fram 14.-17. mars. Spilað er í þremur fjögurra liða riðlum og komast tvö efstu liðin úr hverjum riðli inn á Ólympíuleikana í París.

Liðin sem eru örugg inn í undankeppnina eru Spánn, Noregur, Barein, Brasilía, Svíþjóð, Þýskaland, Ungverjaland og Egyptaland, en fjögur síðastnefndu liðin eiga enn möguleika á að sleppa við undankeppnina og komast beint á ÓL. EM og Afríkumótið gefa eitt öruggt sæti þar hvort mót.

Frakkland, Danmörk, Japan og Argentína eru búin að tryggja sig inn á Ólympíuleikana en átta sæti eru laus.

Næsti leikur Íslands á EM er gegn Austurríki í dag klukkan 14:30 að íslenskum tíma. Öflugt teymi Vísis og Stöðvar 2 er í Köln og flytur fréttir af mótinu í máli og myndum.