Ein starf­hæf fæðingar­deild á Gasa

Nærri tuttugu þúsund börn hafa komið í heiminn á Gasa frá því að átökin brutust út fyrir ríflega hundrað dögum - í síversnandi aðstæður. Einungis ein fæðingardeild er enn starfhæf og þar dvelja einnig fyrirburar, nýburar og stundum mæður þeirra sem hafa verið flutt frá öðrum sjúkrahúsum.

Ein móðirin sem dvelur þar ásamt nýfæddri stúlku segir aðstæðurnar martraðakenndar. „Ég fékk hríðar, varð að undirgangast keisaraskurð og fæddi dóttur. Þegar ég vaknaði eftir uppskurðinn var mér sagt að ég þyrfti að yfirgefa sjúkrahúsið án tafar,“ segir Wisam Al Masri sem var flutt yfir á fæðingardeildina á Al-Helal Al-Emarati-sjúkrahúsinu í Rafah.

Læknar og hjálparstarfsmenn segja brýna þörf á öllum nauðsynjum þrátt fyrir að lyfjum og sjúkragögnum hafi verið hleypt inn á svæðið síðustu daga.

„Ástandið er grafalvarlegt. Hjúkrunarfræðingarnir sem við töluðum við sögðu að fjöldi barnshafandi mæðra sem komu á sjúkrahúsið hafi tuttugufaldast undanfarið og að mörg barnanna væru veik sökum loftmengunar sem mæður þeirra hefðu mátt þola af völdum sprengiárásanna. Sumar mæðranna lifðu barnsburðinn ekki af,“ segir Tess Ingram, talskona UNICEF, sem skoðaði aðstæður á fæðingardeildinni.

Talið er að um sextíu prósent af öllu húsnæði á Gasa sé ýmist ónýtt eða skemmt og níu af hverjum tíu skólum hafa orðið fyrir töluverðum skemmdum. Sameinuðu þjóðirnar ítrekuðu í dag ákall um vopnahlé og yfirmaður palestínsku flóttamannastofnunar SÞ lýsti í dag miklum áhyggjum af framtíð svæðisins.

„Jafnvel þótt hernaðaraðgerðum yrði hætt á morgun yrði ekki hægt að hefja kennslu á ný. Börnin hér á svæðinu hafa orðið fyrir alvarlegu áfalli og glíma við áfallastreituröskun. Fjölskyldurnar hafa mátt þola margvísleg áföll og kennararnir hafa mátt þola stórkostleg áföll. Við höfum ekki í öruggt skjól að venda og við höfum ekki aðgang að nauðsynlegum grunnvirkjum. Það tekur sinn tíma að bæta úr þessu. Eftir því sem tíminn líður grefur reiði og gremja um sig síðar meir. Einnig biturleiki og jafnvel hatur,“ segir Philippe Lazzarin iyfirmaður palestínsku flóttamannastofnunar Sameinuðu þjóðanna.