Al­freð Gísla: Með því vand­ræða­legra sem ég hef upp­lifað lengi

Alfreð hrósaði íslenska liðinu fyrir frammistöðuna sem hann taldi vera þá langbestu hjá íslenska liðinu á Evrópumótinu til þessa. Alfreð sá líka í fyrsta sinn á leik liðsins að Snorri Steinn Guðjónsson væri búinn að ná því fram hjá liðinu hvernig handbolta hann vill að íslenska liðið spili.

Fannst þetta frábær handboltaleikur

„Það var mjög erfitt að bíða eftir því að leikurinn byrjaði og það var mjög skrýtið að fylgjast með báðum liðum. Mér fannst þetta frábær handboltaleikur. Varnarleikurinn og markvarslan hjá báðum liðum var frábær. Mér fannst Íslendingar líka vera að spila frábæran sóknarleik,“ sagði Alfreð Gíslason í samtali við Sindra Sverrisson eftir leikinn.

„Þó að vörnin mín hafi verið mjög góð þá áttum við í miklum vandræðum með Aron (Pálmarsson) í byrjun og svo með Janus Daða (Smárason) í seinni hálfleik. Það gerðist alveg nákvæmlega það sem ég sagði mínu liði, að þeir gætu gleymt fyrstu leikjum Íslands því það væri allt annað íslenskt lið sem kæmi í þennan leik,“ sagði Alfreð.

„Snorri rúllaði liðinu vel og þeir voru allir að spila mjög vel. Þetta var því frábær bolti sem íslensku strákarnir voru að spila líka. Björgvin (Páll Gústavsson) kemur inn og ver tvö víti sem hefði getað snúið leiknum ef Wolff hefði ekki varið tvö síðustu víti Íslands líka,“ sagði Alfreð.

Langbesti leikur Íslands hingað til

„Mér fannst íslenska liðið vera að spila sinn langbesta leik hingað til. Það var mjög erfitt að spila við þá núna og mér fannst þeir taktískt mjög vel innstilltir. Þeim tókst líka mjög vel að stoppa hraðaupphlaupin hjá okkur. Ég vissi að Snorri væri með augun á því og þeir gerðu það mjög vel,“ sagði Alfreð.

„Þetta vannst eiginlega bara á smáatriðum en ég held að lokum höfum við átt skilið að vinna leikinn. Það kom mér ekkert á óvart að Íslandi skildi spila mjög vel. Við vorum að gera það líka og þá sérstaklega í seinni hálfleik,“ sagði Alfreð.

Eins og stuðningsmaður beggja liða

„Ég hef þjálfað marga í íslenska liðinu og fylgst með mörgum. Ég hef tekið nokkra til Þýskalands. Þetta var svona annars vegar að vera mjög stoltur af því hvernig liðið er að spila og svo hvað það var erfitt að vera hinum megin á bekknum. Þetta var mjög skrýtin tilfinning. Ég var orðinn eins og stuðningsmaður beggja liða,“ sagði Alfreð léttur.

„Það jákvæða sem ég sé út úr þessu fyrir Íslands hönd er að þetta var í fyrsta sinn sem línan hans Snorra var mjög greinileg. Hann rúllar liðinu og setur alla inn í þetta. Allir voru að spila vel og þeir voru að spila frábæran varnarleik. Betri en ég bjóst við því þeir voru mjög agressífir en klókir,“ sagði Alfreð.

„Við erum með ungt lið og við erum ekki með breiddina í sóknarleiknum eins og Ísland í útilínunni. Það er að koma og ég var eiginlega mjög stoltur af báðum liðum,“ sagði Alfreð.

Þjóðverjar klikkuðu á því að spila íslenska þjóðsönginn í fyrstu tilraun og það kom mjög flatt upp á marga í höllinni.

Vissi ekki hvaða þjóðsöngur þetta var

„Það er með því vandræðalegra sem ég hef upplifað lengi að það kom rangur þjóðsöngur. Ég vissi ekki hvaða þjóðsöngur þetta væri því það vissi það eiginlega enginn. Ég söng með báðum þjóðsöngvunum. Það er alltaf mikill heiður að standa, horfa á fánann og syngja með,“ sagði Alfreð.

Hvernig sér Alfreð framtíðina hjá íslenska liðinu?

„Við megum ekki gleyma því að íslenska liðið er líka ungt. Liðið er með frábæra hornamenn sem eru reyndar búnir að brenna óvenju mikið af færum í þessu móti. Ísland er með frábæra útispilaralínu og það væru nokkrir sem væru í hópnum hjá mér sem eru ekki í hópnum hjá Íslandi. Þeir eru með það mikla breidd í sókninni,“ sagði Alfreð.

Viktor Gísli hefur verið að gera mest fyrir liðið

„Aron er eini virkilega eldri leikmaðurinn en hann á langt eftir. Það eru frábærir talentar þarna. Það sem hefur verið að gera mest fyrir íslenska liðið undanfarið er að Viktor Gísli (Hallgrímsson) er alltaf að spila betur og betur. Hann er að verða stöðugri í markinu og Bjöggi er mjög verðmætur sem varamarkvörður með alla sína reynslu,“ sagði Alfreð.

„Línumennirnir eru líka að spila betur. Það var alltaf talið vera vandamál hjá Íslandi að markvarslan og línumennirnir væru áhyggjuefni ef við berum saman þetta lið við það þýska. Elliði er núna að spila frábærlega í Gummersbach og búinn að bæta sig svakalega síðustu ár. Hinir eru líka orðnir mjög góðir,“ sagði Alfreð.

Ísland situr á botni milliriðilsins stigalaust. Liðið mætir Frakklandi á morgun klukkan 14:30 en Frakkar unnu dramatískan sigur á Króötum í gær og hafa fjögur stig á toppi riðilsins.