2 dagar í EM: Næst­besta Evrópu­mót strákanna okkar

Fyrsti leikur íslenska karlalandsliðsins á Evrópumóti karla í handbolta er 12. janúar næstkomandi eða eftir aðeins tvo daga. Vísir ætlar að telja niður í komandi Evrópumót með því að raða upp bestu Evrópumótum strákanna okkar í gegnum tíðina.

Næstbesta Evrópumót strákanna okkar var mjög eftirminnilegt Evrópumót í Svíþjóð 2002 en íslenska liðið sprakk þá út á sínu fyrsta stórmóti undir stjórn Guðmundar Guðmundssonar.

Guðmundur hafði tekið við liðinu af Þorbirni Jenssyni eftir HM 2001 og komið því í gegnum umspilsleiki á móti Hvíta-Rússlandi þar sem útileikurinn vannst með sjö mörkum. Liðið sló algjörlega í gegn á Evrópumótinu þar sem hröð upphlaup liðsins komu mörgum mótherjum oft í opna skjöldu.

Ólafur Stefánsson bar boltann upp betur en flestir og línumaðurinn stóri og sterki Sigfús Sigurðsson gat líka hlaupið með. Það má sjá að þarna hafi mátt sjá upphafið að þróun handboltans næstu árin þar sem hröð miðja varð mikilvægur hluti af leiknum. Þetta mót var líka fyrsta skrefið hjá gullkynslóðinni sem átti eftir að gera enn betur næsta áratuginn á eftir.

Þetta var hins vegar öðru fremur útskriftarhátíð Guðmundar sem eins besta handboltaþjálfara heims og aðeins upphafið að því sem hann átti eftir að gera í alþjóðlega handboltanum.

Íslenska liðið gerði jafntefli við Spán í fyrsta leik sem voru ekki slæm úrslit svo sem en um leið gríðarlega svekkjandi þar sem íslensku strákarnir misstu frá sér sigurinn í blálokin.

Tveir sigrar á móti Slóveníu og Sviss tryggðu íslenska liðinu sigur í riðlinum. Liðið byrjaði milliriðilinn á jafntefli við Frakka í öðrum leik á mótinu þar sem sigurinn var í seilingarfjarlægð. Liðið lét það ekki trufla sig heldur vann síðan flotta og örugga sigra á bæði Júgóslavíu og Þýskalandi. Það þýddi að íslenska liðið var komið alla leið í undanúrslitin og hafði enn ekki tapað leik.

Þetta var í fyrsta sinn í heilan áratug sem íslenska liðið spilaði um verðlaun á stórmóti og aðeins í annað skiptið í sögunni á þessum tíma. Áður hafði íslenska liðið komist í undanúrslitin á Ólympíuleikunum í Barcelona 1992.

Í undanúrslitaleiknum á móti Svíum gekk íslenska liðið á vegg og tapaði með ellefu marka mun. Liðið tapaði síðan með sjö mörkum á móti Dönum í leiknum um bronsverðlaunin.

Íslensku strákarnir voru hreinlega bensínlausir í lok mótsins en það munaði líka miklu um meiðsli Patreks Jóhannessonar sem meiddist í sigrinum á Þjóðverjum. Hann spilaði meiddur á móti Svíum en gat ekki beitt sér almennilega.

Ólafur Stefánsson varð þarna að súperstjörnu í handboltaheiminum og í lok ársins var hann kjörinn Íþróttamaður ársins í fyrsta sinn. Hann átti eftir að leiða íslenska liðið næstu árin og hljóta þau verðlaun oftar.

Besti leikmaður Íslands á mótinu:

Ólafur Stefánsson átti stórkostlegt mót og stimplaði sig inn í hóp bestu handboltamanna heims. Ólafur endaði sem markakóngur mótsins með 58 mörk, skoraði einu marki meira en Stefan Lövgren hjá Svíum. Ólafur var einnig með 37 stoðsendingar samkvæmt opinberri tölfræði mótsins og kom því alls að 95 mörkum í átta leikjum eða 11,9 mörkum að meðaltali í leik. Enginn leikmaður kom að fleiri mörkum á Evrópumótinu og Ólafur var að sjálfsögðu valinn í úrvalslið mótsins.

Óvænta stjarnan:

Ísland eignaðist heimsklassa línumann í Sigfúsi Sigurðssyni sem sprakk út eftir að Guðmundur Guðmundsson tók við liðinu. Frábær varnarmaður sem kletturinn í miðri íslensku vörninni en á þessu móti var hann einnig lykilmaður í hröðum upphlaupum íslenska liðsins. Skoraði 31 mark í mótinu eða 3,9 mörk að meðaltali í leik.

Fyrsta mótið hjá:

Bjarni Frostason, Gunnar Berg Viktorsson, Halldór Ingólfsson og Sigfús Sigurðsson.

Síðasta mótið hjá:

Bjarni Frostason og Halldór Ingólfsson.

Viðtalið: Ég er stoltur og hrærður

„Eftir að leikurinn var hafinn var aldrei vafi í mínum huga að við myndum vinna, allir voru fullkomlega með hugann við leikinn og gerðu frábæra hluti á leikvellinum,“ sagði Guðmundur Guðmundsson, landsliðsþjálfari, í viðtali við Morgunblaðið eftir fimm marka sigur á Þjóðverjum, 29-24. Þar með tryggði íslenska liðið sér efsta sæti milliriðilsins og mætti þar með Svíum í undanúrslitum.

„Nú er ég fyrst og fremst stoltur og hrærður. Um leið er ég þakklátur fyrir að hafa fengið tækifæri til að taka að mér þetta starf,“ sagði Guðmundur ennfremur.

„Við erum ósigraðir og því samhengi má heldur ekki gleyma að við höfum ekki verið að leika við neinar meðalþjóðir í þessari keppni, heldur flestar bestu handknattleiksþjóðir heims. Ég verð að viðurkenna að eftir að við vorum komnir í milliriðla og mér varð ljós sá gríðarlegi styrkur sem í liðinu bjó, þá fór ég að hafa fulla trú á því að við gætum farið alla leið. Sigur í milliriðli var ef til vill fyrirfram bjartsýnismarkmið sem maður leiddi vart hugann að.

„Ég hef alltaf fundið þessa gríðarlegu einbeitingu sem er í liðinu og hún kom svo sannarlega fram í þessum frábæra leik, liðið virðist geta bætt endalaust við sig, hver sem andstæðingurinn er,“ sagði Guðmundur.