3 dagar í EM: Þriðja besta Evrópu­mót strákanna okkar

Fyrsti leikur íslenska karlalandsliðsins á Evrópumóti karla í handbolta er 12. janúar næstkomandi eða eftir aðeins þrjá daga. Vísir ætlar að telja niður í komandi Evrópumót með því að raða upp bestu Evrópumótum strákanna okkar í gegnum tíðina.

Þriðja sætið yfir bestu Evrópumót strákanna okkar fer til Evrópumótsins í Danmörku fyrir áratug síðan en íslenska liðið náði fimmta sætinu á mótinu.

Aron Kristjánsson stýrði þarna íslenska liðinu á sínu öðru stórmóti en liðið hafði endað í tólfta sæti á heimsmeistaramótinu ári fyrr.

Ísland byrjaði mótið á flottum fimm marka sigri á Norðmönnum og gerði svo jafntefli við Ungverja í næsta leik. Lokaleikur riðilsins tapaðist á móti sterku spænsku liði. Íslenska liðið fór með eitt stig með sér inn í milliriðil en byrjaði þar vel.

Liðið vann tvo fyrstu leiki sína á móti Austurríki og Makedóníu. Það var hins vegar ljóst fyrir lokaleikinn að Danir og Spánverjar voru búnir að tryggja sér sæti í undanúrslitunum. Danaleikurinn tapaðist stórt. Danir unnu silfurverðlaunin og Spánverjar tóku bronsið á þessu móti.

Íslensku strákarnir tryggðu sér fimmta sætið með sigri á Póllandi, 28-27, í leiknum um fimmta sætið þar sem liðið kom til baka eftir að hafa verið þremur mörkum undir í hálfleik. Íslenska liðið gerði mjög vel í þeim leik en liðið lék án Arons Pálmarssonar í þeim leik og Arnór Atlason var líka dottin út.

Snorri Steinn Guðjónsson, núverandi þjálfari liðsins, var frábær í Póllandsleiknum með átta mörk úr aðeins tíu skotum og gaf fimm stoðsendingar að auki. Gunnar Steinn Jónsson lék líka mjög vel og var með fimm mörk og sex stoðsendingar en hann var þarna á sínu fyrsta stórmóti.

Besti leikmaður Íslands á mótinu:

Guðjón Valur Sigurðsson var frábær í vinstri horninu og spilaði sig inn í úrvalslið mótsins. Guðjón skoraði 44 mörk eða 6,3 í leik og nýtti 73 prósent skota sinna. Það var aðeins Spánverjinn Joan Canellas sem skoraði fleiri mörk en fyrirliði íslenska liðsins á þessu móti. Þetta var í þriðja skiptið sem Guðjón komst í úrvalslið á stórmóti en enginn annar vinstri hornamaður hafði komist oftar en einu sinni í slíkt lið á áratugnum á undan.

Óvænta stjarnan:

Bjarki Már Gunnarsson kom gríðarlega sterkur inn í íslensku vörnina á þessu móti og var kletturinn í miðri vörninni. Bjarki var þarna nýkominn út til Þýskalands frá HK þar sem hann fékk samning hjá EHV Aue. Hann hafði aðeins spilað samtals fimm landsleiki þegar lokaundirbúningur liðsins fyrir EM hófst í byrjun janúar. Gunnar Steinn Jónsson spilaði einnig frábærlega í fjarveru Aron Pálmarssonar í lokaleik mótsins.

Fyrsta mótið hjá:

Gunnar Steinn Jónsson og Bjarki Már Gunnarsson.

Síðasta mótið hjá:

Þórir Ólafsson.

Viðtalið: „Framtíð handboltans var í húfi“

„Strákarnir stóðu sig frábærlega og þessi sigur var punkturinn yfir i-ið,“ sagði Aron

í samtali við Fréttablaðið eftir sigur á Póllandi í leiknum um fimmta sætið. „Það var ánægjulegt að klára mótið með sigri á afar sterku liði Pólverja, ekki síst þar sem við vorum án margra lykilmanna. Þessir yngri og reynsluminni kláruðu þennan leik fyrir okkur,“ bætti Aron við.

Aron sagði að sérstök áhersla hafi verið lögð á að undirbúa liðið fyrir riðlakeppnina: „Við lögðum allt í að koma okkur upp úr riðlinum því þar var framtíð íslensks handbolta í húfi. Við undirbjuggum okkur ótrúlega vel fyrir Noregsleikinn og spiluðum frábærlega í þeim leik.“

Strákarnir fóru áfram í milliriðlakeppnina með eitt stig og unnu svo sína tvo fyrstu leiki þar. Eftir því sem leið á mótið reyndi á breidd íslenska liðsins og Aron var ánægður með hana.

„Bjarki Már [Gunnarsson] kom virkilega sterkur inn í vörnina og Gunnar Steinn [Jónsson] kom inn í liðið eins og maður með margra ára landsliðsreynslu að baki. Það var virkilega ánægjulegt,“ sagði Aron.

„Ég tel að við höfum náð töluvert miklu úr breiddinni og þeim strákum sem við sýndum traust. Það er ekki hægt að ætlast til þess að menn sem spila í smærri deildum og liðum en þeim allra bestu geti komið fullmótaðir inn í landsliðið og unnið bestu þjóðir heims. En við lögðum áherslu á að undirbúa okkur alltaf mjög vel og það skilaði sínu,“ sagði Aron.