5 dagar í EM: Fimmta besta Evrópu­mót strákanna okkar

Fyrsti leikur íslenska karlalandsliðsins á Evrópumóti karla í handbolta er 12. janúar næstkomandi eða eftir fimm daga. Vísir ætlar að telja niður í komandi Evrópumót með því að raða upp bestu Evrópumótum strákanna okkar í gegnum tíðina.

Fimmta sætið yfir bestu Evrópumót strákanna okkar kemur í hlut Evrópumótsins í Sviss árið 2006 sem var annað stórmót liðsins undir stjórn Viggós Sigurðssonar.

Íslenska liðið vann reyndar bara tvo leiki á mótinu en var engu að síður nálægt því að komast í undanúrslitin.

Íslensku strákarnir tóku með sér þrjú stig upp úr riðlinum þar sem tap í lokaleiknum á móti Ungverjum skipti engu máli. Ólafur Stefánsson meiddist eftir gróft brot í sigrinum á Serbum í fyrsta leik og besti leikmaður liðsins missti af næstu leikjum Íslands.

Íslenska liðið vann síðan 34-32 sigur á Rússum í fyrsta leik milliriðilsins og var í frábærum málum. Rússaleikurinn er reyndar þekktastur fyrir það að Alexander Petersson kjálkabrotnaði snemma í leiknum eftir að hafa fengið þungt högg. Alexander harkaði af sér og kláraði leikinn en eftir hann var ljóst að þátttöku hans á mótinu var lokið.

Íslenska liðið saknaði auðvitað Alexanders mikið í síðustu tveimur leikjum sem töpuðust báðir. Sá fyrri á móti Króatíu tapaðist með einu marki þar sem íslensku strákarnir hentu boltanum frá sér þegar þeir áttu möguleika á því að jafna metin á lokasekúndunum.

Lokaleikurinn á móti Noregi er einnig sögulegur. Íslenska liðið var yfir í hálfleik en réð ekkert við Kjetil Strand sem setti met með því að skora nítján mörk í leiknum og fara fyrir sigri norska liðsins. Norðmenn voru neðstir í riðlinum og það breyttist ekki við þessi úrslit.

Íslenska liðið endaði í fjórða sæti í sínum milliriðli og í sjöunda sætinu á mótinu.

Viggó Sigurðsson hafði gefið mörgum framtíðarmönnum liðsins tækifæri í tveimur mótum en náði sjálfur aldrei að uppskera almennilega fyrir það. Hann sagði starfi sínu lausu um sumarið eftir að hafa orðið sér til skammar í flugvél á leiðinni heim úr móti með 21 árs landsliðinu. Viggó baðst afsökunar en var ósáttur með að fá ekki meiri stuðning frá HSÍ. Hann hætti því strax með liðið og Alfreð Gíslason tók við liðinu.

Besti leikmaður Íslands á mótinu:

Ólafur Stefánsson missti af tveimur leikjum íslenska liðsins í riðlinum en spilaði sig engu að síður inn í úrvalslið Evrópumótsins. Hann var með 33 mörk og 17 stoðsendingar í fjórum leikjum samkvæmt opinberri tölfræði mótsins og kom því að 50 mörk í aðeins fjórum leikjum.

Óvænta stjarnan:

Snorri Steinn Guðjónsson var skilinn eftir heima á HM í Túnis ári fyrr en simplaði sig frábærlega inn í íslenska liðið á þessu móti. Snorri var markhæsti leikmaður íslenska liðsins með 42 mörk en hann nýtti meðal annars 85 prósent víta sinna, 17 af 20. Snorri varð fimmt markahæsti leikmaður EM.

Fyrsta mótið hjá:

Heimir Örn Árnason, Sigurður Eggertsson, Þórir Ólafsson og Vilhjálmur Halldórsson.

Síðasta mótið hjá:

Heimir Örn Árnason, Sigurður Eggertsson og Vilhjálmur Halldórsson.

Viðtalið: „Vonbrigðin eru rosaleg“

„Vonbrigðin eru alveg rosaleg og ég hef í raun litlu við það að bæta,“ sagði hundsvekktur og sárþjáður fyrirliði Íslands, Ólafur Stefánsson, eftir leikinn í viðtali við Fréttablaðið. „Markvarslan var ekki til staðar í seinni hálfleik og kannski vantaði líka upp á vörnina. Sóknin var svo ekkert sérstök enda vorum við passífir og ekki nógu grimmir. Þetta er grátlegur endir á góðu móti en vonandi höldum við haus og byggjum ofan á þessa reynslu,“ sagði Ólafur