Hverja tekur Snorri Steinn með á EM?

Það er mikið undir hjá íslenska liðinu í þessu móti í janúar næstkomandi því auk þess að reyna að ná árangri á þessu Evrópumóti þá mun liðið líka reyna að halda Ólympíudraumnum á lífi. Íslenska liðið er spáð góðu gengi á mótinu og það mun fá mikinn stuðning frá fjölmörgum Íslendingum sem mæta til München.

Snorri færi það krefjandi verkefni að velja átján manna EM-hóp en sextán leikmenn eru í liðinu í hverjum leik.

Hefja æfingar á þriðja degi jóla

Íslenska landsliðið kemur saman til æfinga á Íslandi 27. desember næstkomandi og liðið heldur svo til Austurríkis 5. janúar. Liðið leikur þar tvo vináttulandsleiki gegn Austurríki áður en haldið verður til München í Þýskalandi.

Snorri stýrði íslenska liðinu í fyrsta sinn á móti Færeyjum í nóvember og það eru ekki miklar líkur á því að hann breyti hópnum mikið frá þeim leikjum. 21 leikmaður var samt valinn í það verkefni.

Snorri mun væntanlega velja átján manna EM-hóp og það þýðir niðurskurð um þrjá leikmenn frá hópnum í síðasta mánuði. Snorri gæti vissulega valið stærri æfingahóp til að byrja með en það á allt eftir að koma í ljós.

Hverjir komast í átján manna hópinn?

Vangaveltur okkar á Vísi í dag snúa að því hvaða leikmenn komast í átján manna lokahópinn.

Stærsta spurningin snýr að leikstjórnandanum Gísla Þorgeiri Kristjánssyni sem hefur ekki spilað með landsliðinu síðan að hann meiddist á öxl á úrslitahelgi Meistaradeildarinnar. Heill Gísli er alltaf öruggur í hópinn og líkurnar á því að hann verði með jukust í gærkvöldi eftir að hann spilaði með Magdeburg í fyrsta sinn á tímabilinu.

Magdeburg vildi örugglega óska sér þess að fá að spara Gísla fyrir seinni hluta tímabilsins í stað þess að missa hann í krefjandi stórmót með íslenska landsliðinu. Gísli vill hins vegar ólmur vera með og það er ljóst að hann getur breytt miklu fyrir íslenska liðið.

Annar lykilleikmaður sem er að glíma við meiðsli er Elvar Örn Jónsson sem eins og Gísli er öruggur í hópnum sé hann klár. Elvar er bjartsýnn á að ná mótinu og verður því vonandi með. Það eru góðar fréttir enda Elvar kominn í mjög stórt hlutverk í íslenska landsliðinu.

Líklegt og ekki eins líklegt

Viktor Gísli Hallgrímsson er öruggur með markvarðarstöðuna og það er langlíklegast að Björgvin Páll Gústavsson verði varamarkvörður. Ágúst Elí Björgvinsson gæti verið valinn í stærri hóp en er ekki líklegur í lokahópinn.

Bjarki Már Elísson er með vinstri hornastöðuna í hendi sem fyrr en líklegt er að Stiven Tobar Valencia fari með enda býður hann líka upp á fleiri möguleika í vörninni.

Aron Pálmarsson og Elvar Örn Jónsson verða væntanlega vinstri skyttur liðsins en nú er það ljóst að Elvar Ásgeirsson fer ekki með. Hann gefur ekki kost á sér þar sem konan hans á von á barni á meðan mótinu stendur.

Búast má við því að auk Gísla verði leikstjórnendurnir Janus Daði Smárason og Haukur Þrastarson báðir í hópnum og þá verða hægri skytturnar Ómar Ingi Magnússon og Viggó Kristjánsson örugglega báðir með.

Spurning er hvort að Kristján Örn Kristjánsson fari með sem þriðja hægri skyttan eða hvort að Snorri ákveði að vera með tvo hægri hornamenn. Hann gæti líka farið með fimm örvhenta leikmenn með út. Sigvaldi Björn Guðjónsson verður alltaf í hópnum og líklegast er að markavélin Óðinn Þór Ríkharðsson verði þar líka.

Ungir menn að banka á dyrnar

Línumennirnir Arnar Freyr Arnarsson, Elliði Snær Viðarsson og Ýmir Örn Gíslason verða væntanlega líka í hópnum. Það er aftur á móti spurning hvort að Einar Þorsteinn Ólafsson verði með í hópnum sem aukagír í varnarleiknum en það sem ýtir undir það er að hér er líklegur framtíðarmaður sem gæti hjálpað landsliðinu mikið í framtíðinni.

Annar ungur leikmaður sem er að banka á dyrnar er stórskyttan Þorsteinn Leó Gunnarsson sem hefur spilað mjög vel með Aftureldingu í Olís deild karla í vetur. Þorsteinn er líklegri í lokahópinn vegna forfalla Elvars en Þorsteinn býður vissulega upp á eitthvað sem vantar kannski í liðið sem eru skot fyrir utan.

Snorri getur farið vissulega nokkrar ólíkar leiðir í vali sínu og það verður því spennandi að sjá lokahópinn þegar hann verður opinberaður á morgun.