Reykja­víkur­borg til­búin að draga úr hækkunum

Verkalýðshreyfingin hefur kallað ríki, sveitarfélög og fyrirtæki til ábyrgðar í baráttunni við verðbólguna. Engin merki væru á lofti um að þessir aðilar ætli að leggja sitt af mörkum, sem geti sett stórt strik í reikninginn fyrir komandi kjarasamninga.

Samninganefnd Alþýðusambandsins réði ráðum sínum á fundi í dag í tengslum við gerð nýrra kjarasamninga á almennum markaði eftir að núgildandi skammtímasamningar renna úr gildi hinn 31. janúar. Seðlabankinn hefur kallað eftir því að allir leggist á eitt við að ná niður verðbólgunni, bæði aðilar vinnumarkaðarins, hið opinbera og verslunin í landinu.

Einar Þorsteinsson, formaður borgarráðs og verðandi borgarstjóri, segir borgina tilbúna til þess að leggja sitt af mörkum.

Verkefni sem allir þurfa að vinna saman

Einar segir það lykilatriði að ná niður verðbólgu og háu vaxtastigi. Það sé verkefni sem allir þurfi að leggjast á eitt um til þess að leysa.

„Það sem skiptir mestu máli er að aðilar vinnumarkaðarins nái hófsömum kjarasamningum með það að markmiði að ná verðstöðugleika í landinu. Ef það tekst þá er Reykjavíkurborg tilbúin að axla ábyrgð og draga úr þessum breytingum á gjaldskrám, og ég geri ráð fyrir því að önnur sveitarfélög muni fylgja því. Við þurfum að eiga samtal um það á breiðum grundvell,“ sagði Einar í kvöldfréttum Stöðvar 2.

Hann lagði þó áherslu á það að lykilatriðið sé við samningaborðið og bíða þurfi og sjá hver niðurstaðan verður þar. Verkalýðshreyfingin hefur aftur á móti sagt boltann vera hjá sveitarfélögunum og jafnvel gengið svo langt að boða frestun viðræðna fram yfir áramót.

Mögulegt að endurskoða gjaldskrár eftir á

Einar segir að sveitarfélög séu á lokametrunum við gerð fjárhagsáætlana. Seinni umræða um fjárhagsáætlun Reykjavíkurborgar fari til að mynda fram á þriðjudag í næstu viku og henni verði ekki breytt úr þessu.

„En það er með þessum fyrirvara að ef kjarasamningar nást og þeir eru hófsamir og skynsamir, þá er hægt að endurskoða þessar gjaldskrár. En við þurfum líka að gera það í stærra samtali. Sveitarfélögin þurfa að finna það að atvinnulífið sé tilbúið að axla þá ábyrgð að velta ekki öllum hækkunum út í verðlagið og launakröfurnar þurfa að vera hófsamur. Auðvitað er þetta bara svona.“

Þá segir hann að ríkið þurfi einnig að koma að borðinu og það sé enginn einn sem nái niður verðbólgunni. Allir þurfi að leggjast á árarnar.

„Það er verið að gjaldskrárnar halda verðgildi sínu og það er það sem alls staðar er að gerast. Þær eru að breytast og hækka vegna þess að launakostnaður hefur aukist. Þannig að þarna erum við komin með svona hænuna og eggið, nú er bara kominn sá tímapunktur að við verðum að ná árangri.