Besta byrjun lands­liðs­þjálfara í 59 ár

Íslensku strákarnir unnu báða leikina, fimmtán marka sigur í þeim fyrri (39-24) og eins marks sigur í þeim seinni (30-29).

Fyrri leikurinn lagði grunninn að góðri útkomu helgarinnar en Snorri var samt aðeins sjötti fastráðni landsliðsþjálfarinn sem vinnur fyrstu tvo leiki sína með liðinu.

Útkoman voru tvær sigrar og sextán mörk í plús. Það er einu marki betri byrjun en hjá Aroni Kristjánssyni árið 2012. Aron stýrði liðinu þá til sigurs á Hvíta-Rússlandi (36-28) og Rúmeníu (37-30).

Þorbjörn Jensson vann líka tvo fyrstu leiki sína með landsliðinu með samtals fjórtán marka mun en þeir voru á móti Noregi (27-23) og Austurríki (29-19) haustið 1995.

Í raun þarf að fara alla leið aftur til ársins 1964 til að finna betri byrjun hjá landsliðsþjálfara í tveimur fyrstu leikjum sínum.

Karl G. Benediktsson stýrði þá íslenska landsliðinu til sigurs í tveimur leikjum á móti Bandaríkjunum á Keflavíkurflugvelli. Fyrri leikurinn vannst með átján mörkum, 32-14, og sá seinni með sextán mörkum, 32-16.

Karl var þá að undirbúa íslenska landsliðið fyrir HM í Tékkóslóvakíu þar sem liðið vann síðan tvo fyrstu leiki sína þar af 12-10 marka sigur á Svíum sem er einn af stærstu sigrunum í sögu íslenska karlalandsliðsins í handbolta.