Liðin í Ryder-bikarnum full­mönnuð

Ryder-bikarinn er keppni á milli úrvalsliðs Evrópu og Bandaríkjanna. Keppnin fer fram annað hvert ár og er ávallt beðið með mikilli eftirvæntingu en í ár verður það haldið rétt utan við Róm á Ítalíu.

Ákveðið mörg sæti í hvoru liði eru tekin frá fyrir leikmenn sem efstir eru á stigalistum en þjálfarar liðanna geta síðan valið sex leikmenn hvor til að fylla öll pláss í hópnum.

Englendingurinn Luke Donald er fyrirliði Evrópuliðsins í keppninni í ár og á dögunum tilkynnti hann hverjir munu skipa lið Evrópu þegar mótið hefst þann 29. september næstkomandi.

Donald gat valið sex leikmenn fyrir utan þá sem þegar höfðu tryggt sér sæti og hlutu þeir Ludvig Åberg, Tommy Fleetwood, Nicolai Hojgaard, Shane Lowry, Justin Rose og Sepp Straka náð fyrir augum Donald sem sjálfur er reynslumikill keppandi í Ryder-bikarnum.

Þessir sex bættust í hóp þeirra Rory McIlroy, Jon Rahm, Robert Macintyre, Viktor Hovland, Tyrell Hatton og Matt Fitzpatrick sem þegar höfðu tryggt sér sæti í liðinu.

Zach Johnson er fyrirliði liðs Bandaríkjanna. Hann valdi Sam Burns, Rickie Fowler, Brooks Koepka, Collin Morikawa, Jordan Spieth og Justin Thomas í sitt lið en þeir Scottie Scheffler, Wyndham Clark, Brian Harman, Patrick Cantlay, Max Homa og Xander Schauffele tryggðu sér sjálfir sæti í liðinu.

Bandaríkjamenn eiga titil að verja en þeir unnu stórsigur á Evrópuliðinu fyrir tveimur árum þegar mótið fór fram í Bandaríkjunum. Lokatölur urðu 19-9 og er það mesti munur sem orðið hefur á liðunum í sögu Ryder-bikarsins. Evrópa hefur ekki tapað móti á heimavelli síðan árið 1993 þegar mótið fór fram á hinum sögufræga Belfry-velli.