Almar í kassanum kominn í tjald: „Ég er stað­settur á miðri folf braut“

„Ég hef aldrei komið á Hornafjörð áður og er meira að segja með ofnæmi fyrir skelfisk. Ég hef einu sinni komið til Keflavíkur og ímyndaði mér að þetta væri svipað,“ segir Almar sem dvalið hefur í tjaldinu í hálfan mánuð. Hann ætlar að vera þarna í um þrjár vikur í viðbót og mála.

Almar er best þekktur fyrir gjörninginn og útskriftarverkefnið sitt, Almar í kassanum, árið 2015 þegar hann dvaldi lengi berrassaður í litlum glerkassa. Þjóðin fylgdist þá grannt með honum í gegnum myndavél.

Núna dvelur hann upp á hól í Höfn sem kallast Hrossó, í tjaldi sem hann útbjó fyrir þetta verkefni. Gjörningurinn ber heitið Tjaldurinn á Hrossó.

„Ég er staðsettur á miðri folf braut. Fólk er mikið að folfa í tjaldið mitt og yfir það. Ég reyni að mála folfarana og þeir eru mishrifnir af því. En þetta er eini félagsskapurinn sem ég hef hérna, þessir folfarar,“ segir Almar.

Hann segist ekki ætla að vera á Adamsklæðunum í þetta skiptið. „Ekki nema þegar ég fer í sund,“ segir hann.

Dirfska listasafnsins

Gjörningurinn er vísun í fræga heimsókn landslagsmálarans Ásgríms Jónssonar til Hafnar árið 1912. Það var Snæbjörn Brynjarsson, safnstjóri Listasafnsins, sem gaukaði hugmyndinni að Almari að gera eitthvað til að minnast þessarar heimsóknar.

Ásgrímur kveikti mikinn áhuga hjá Hornfirðingum á listmálun. Pöntuðu þeir liti frá Skotlandi og stofnuðu með sér málarafélag. Úr varð eins konar hreyfing sem innihélt meðal annarra listamanninn Svavar Guðnason.

„Þá fóru jafnt hreppsómagar og bæjarstjórar út að mála í tylftum og til varð svolítið skrýtið og íslenskt málverk,“ segir Almar um það sem hann kallar Hornafjarðarskólann.

Sjálfur segist Almar líta meira upp til þessara málara en Ásgríms. Hann segist þó ekki geta logið því að vera reyndur landslagsmálari.

„Að standa úti og mála er algjörlega nýtt fyrir mér. Það er ákveðin dirfska af safninu að fá jafn vanhæfan mann og mig í starfið,“ segir Almar.

Stefnir á hundrað myndir

Almar málar mikið af skýjum og þoku. En einnig allt sem fyrir augu ber. Þegar blaðamaður náði af honum tali var hann að mála Sindraleik.

„Ég reyni að framleiða eins mikið af málverkum og ég mögulega get. Ég stefni á svona hundrað myndir en það næst aldrei,“ segir Almar.

Afraksturinn verður svo sýndur á myndlistarsýningu á Svavarssafni á Höfn þann 15. september.

Ekki er hægt að fylgjast með Almari í beinni útsendingu en vitaskuld er hægt að heilsa upp á hann á staðnum.

„Það eru allir guðvelkomnir í folf og kaffi. Ef ég verð ekki í tjaldinu þá verð ég einhvers staðar á svæðinu að mála,“ segir Almar.