Festi undir­ritaði samning um kaup á Lyfju

Þetta kemur fram í tilkynningu frá Festi hf. og SID ehf., eiganda Lyfju hf. til Kauphallar. Kaupsamningurinn var gerður á grundvelli samkomulags sem gert var 17. mars. Festi rekur meðal annars Krónuna, N1 og Elko. Lyfja rekur 45 apótek auk heild- og smásölu með heilsutengdar vörur. 

Stærsti eigandi Lyfju í gegnum SID, með 70 prósenta hlut, er framtakssjóðurinn SÍA III sem er í rekstri sjóðastýringarfyrirtækisins Stefnis. Aðrir hluthafar eru félög í eigu fjárfestanna Inga Guðjónssonar og Daníels Helgasonar.

Viðskiptin eru háð skilyrðum á borð við samþykki hluthafafundar Festi og samþykki Samkeppniseftirlitsins. Gangi viðskiptin eftir er gert ráð fyrir að þeim ljúki á fyrsta ársfjórðungi 2024. Stendur til að boða til hluthafafundar Festi á næstu vikum.

Að sögn samningsaðila gera áætlanir Lyfju fyrir árið 2023 ráð fyrir að hagnaður fyrir afskriftir, fjármagnsliði og skatta (EBITDA), án IFRS16 áhrifa, nemi 1.044 milljónum króna. Samkvæmt kaupsamningnum þá verður kaupverðið greitt með afhendingu 10 milljón hluta í Festi og greiðslu 6 milljarða króna með handbæru fé að frádregnum nettó vaxtaberandi skuldum Lyfju á efndadegi.

Tókst í annarri tilraun

Þetta var ekki í fyrsta skipti sem Festi gerði tilboð í allt hlutafé í Lyfju en eigendur lyfjaverslananna settu félagið í söluferli árið 2021. Samkvæmt heimildum Innherja var Festi meðal þeirra sem gerðu tilboð í félagið en líkt og önnur tilboð á þeim tíma var það undir þeim væntingum sem eigendur höfðu gert sér um virði fyrirtækisins. Að sögn Innherja höfðu þeir gert sér vonir um að geta fengið liðlega átta milljarða króna fyrir félagið. Tilboð Festi var hins vegar sagt vera langt undir þeim verðmiða.

Núverandi eigendahópur kom að Lyfju árið 2018 þegar fjárfestarnir keyptu félagið af Lindarhvol, umsýslufélagi sem var falið að halda utan um stöðugleikaeignir íslenska ríkisins. Árið áður hafði Samkeppniseftirlitið ógilt kaup Haga, eiganda Bónuss og Hagkaups, á Lyfju en smásölurisinn hafði samþykkt að greiða 6,7 milljarða króna fyrir apótekskeðjuna. Kaupverð SÍA III og einkafjárfestanna á Lyfju var hins vegar talsvert lægra.

Mikil tækifæri felist í samþættingu

Ásta S. Fjeldsted, forstjóri Festi, segir í tilkynningu um undirritun kaupsamningsins að stjórnendur félagsins séu afar ánægðir með þessi kaup og að Lyfja sé vel rekið félag. 

„Mikil tækifæri felast í samþættingu þjónustu þvert á félögin innan Festi sem og framboði breiðara úrvals nauðsynjavara á hagstæðu verði fyrir viðskiptavini okkar um land allt. Samhljómur fyrirtækjanna er skýr m.a. hvað varðar fyrirbyggjandi heilsuvernd og aukin þægindi við innkaup.“

Ingi Guðjónsson, stjórnarformaður Lyfju og einn eigenda SID ehf., hefur átt samleið með apótekum Lyfju í að verða 30 ár, fyrst sem lyfjafræðingur og stofnandi og síðar sem fjárfestir og stjórnarformaður.

„Ég er afar stoltur af því sem starfsfólk okkar hefur áorkað á síðustu tæpu fimm árum og hlakka til að fylgjast með Lyfju dafna til framtíðar innan samstæðu Festi. Félagið hefur byggt upp ólík verslunarfélög með hugmyndafræði sem viðskiptavinum líkar og starfsfólkið er stolt af. Ég tel að Lyfja eigi vel heima innan þessarar fjölskyldu,“ er haft eftir Inga í tilkynningu.