Lands­bankinn fluttur úr fjór­tán húsum undir eitt þak í Reykja­stræti

Nýja landsbankahúsið er 16.500 fermetrar ofan jarðar en þar er að auki þjónustukjallari og bílakjallari. Bankinn verður með starfsemi í suðurenda byggingarinnar en utanríkisráðuneytið í norður byggingu nær Hörpu.

Framkvæmdir við nýja landsbankahúsið hófust árið 2019 eða fyrir fjórum árum. Starfsmenn Landsbankans voru áður á mörgum stöðum í Kvosinni en sameinast nú í raun í minna húsnæði en áður.

„Já, það erum við að gera,“ segir Lilja Björk Einarsdóttir bankastjóri. „Við erum að fara í næstum helmingi færri fermetra en áður. Þannig að það er heilmikill munur. En við erum líka að fjárfesta til framtíðar. Við vorum eiginlega í 100 ár, 99 ár, á gamla staðnum og nú erum við að koma á þennan nýja stað. Þetta er hús sem mun duga okkur í önnur hundrað ár. Þannig að þetta er fjárfesting til framtíðar fyrir bankann,“ segir Lilja Björk.

Bankinn er nú kominn úr tólf byggingum undir eitt þak í Reykjastræti 6 þar sem rúmlega sex hundruð starfsmenn vinna á fimm hæðum í opnum rýmum. Það á líka við um bankastjórann sem er ekki með lokaða skrifstofu út af fyrir sig.

„Þetta hús gerir okkur að betri banka. Það er alveg ljóst. Þetta er hannað fyrir starfsfólk og starfsemina. Maður er alltaf að hitta og sjá fólk. Sýnileikinn er frábær. Þannig að ég held að við verðum jákvæð og skemmtileg og þá erum við að þjóna viðskiptavinum betur. Þá er markmiðinu náð. Þetta verður frábært fyrir okkur,“ segir bankastjórinn.

Helgi Mar Hallgrímsson aðalhönnuður hússins hjá Nordic Office of Architecture segir markmiðið hafa verið að byggja góðan vinnustað sem jafnframt væri opinn almenningi. En húsið er hannað í samvinnu við C.F. Möller arkitekta í Danmörku. Oft væru gerðar margar málamiðlanir frá samkeppistillögu að endanlegri útgáfu.

„En í þessu tilfelli myndi ég segja að rauði þráðurinn hafi náð að haldast alveg í gegnum allan ferilinn. Þannig að í raun er ótrúlega lítill munur á fyrstu hugmyndunum sem við settum fram og tilbúnu húsi sem er mjög ánægjulegt,” segir Helgi Mar.

Halldóra Vífilsdóttir verkefnisstjóri byggingarinnar hjá Landsbankanum segir að bankinn og stjórnarráðið komi til með að nýta sameiginlega jarðhæð hússins. Hægt verð að ganga í gegnum jarðhæðina til og frá Reykjastræti, að Hörpu eða Kalkofnsvegi.

„Við erum líka hér með bankastarfsemi. Með útibú og sjálfsafgreiðslusvæði fyrir okkar viðskiptavini. Og þetta er líka hús sem almenningur getur komið inn í,“ segir Halldóra. Gengið verði frá lóð hússins í sumar og innra byrði hluta hússins sem ríkið hafi keypt í haust.

Lilja Björk bankastjóri segir lóðina langt í frá þá dýrust á höfuðborgarsvæðinu eins og margir hafi haldið fram. Fermetrinn hafi kostað bankann um 58 þúsund krónur. Húsið fæli í sér sparnaði, væri fallegt og hagnýtt og sæmdi sér vel á þessum stað í nágrenni Hörpu.

„Þetta er hús á áberandi stað. Þannig að við vildum að sjálfsöðgu að það félli vel inn í umhverfið. Þetta hús tekur ekki athyglina frá Hörpu. Harpa er drottningin á svæðinu,“ segir Lilja Björk Einarsdóttir.