„Vegna þess trúnaðar sem ríkir um starfsemi fjármálaeftirlits Seðlabanka Íslands getum við almennt ekki tjáð okkur um hvort ákveðin mál eru til skoðunar eða ekki,“ segir Fjármálaeftirlit Seðlabankans.
Hildur Björnsdóttir, oddviti Sjálfstæðisflokksins, vakti athygli á því í gær að borginni hafi fengið bréfið 28. febrúar. Þar voru gerðar athugasemdir við að Reykjavík uppfylli ekki öll lágmarksviðmið fyrir rekstur A-hluta, það er aðalsjóður borgarinnar sem felur í sér sjóði og stofnanir sem eru rekin fyrir skattfé borgarbúa.
Nefndin sendi bréf til 21 sveitarfélags vegna fjárhagsáætlunar fyrir árið 2023.
Í bréfinu kemur fram að hlutfall nettóskulda borgarinnar af tekjum sé 92,9 prósent samkvæmt fjárhagsáætlun ársins 2023. Rekstrarniðurstaða samkvæmt fjárhagsáætlun fyrir árið þyrfti að vera jákvæð miðað við gefnar forsendur en er neikvæð um 3,7 prósent.
Sveitarstjórnum er heimilt að víkja frá skilyrðum um jafnvægis- og skuldareglu út árið 2025, samkvæmt bráðabirgðaákvæði í sveitastjórnarlögum. Eftirlitsnefndin leggur engu að síður þá skyldu á borgina, sem og önnur sveitarfélög, að árið 2026 þurfi að uppfylla skilyrðin.
Halldóra Káradóttir, sviðsstjóri fjármála- og áhættustýringarsviðs borgarinnar, sagði í frétt Morgunblaðsins að það hafi ekki komið til álita að tilkynna Kauphöll um bréf eftirlitsnefndarinnar þar sem ekki hafi verið um „nýjar eða óþekktar upplýsingar að ræða“. Bendir hún á að í bréfinu sé vísað í upplýsingar sem fram komi í fjárhagsáætlun Reykjavíkurborgar 2023- 2027, sem kynnt hafi verið í Kauphöll í nóvember á síðasta ári.
Þetta er bara rútínubréf frá eftirlitsnefndinni.
„Þetta er bara rútínubréf frá eftirlitsnefndinni,“ sagði Dagur B. Eggertsson borgarstjóri í samtali við mbl.is. „Rekstrarniðurstaða sveitarfélaga síðustu tvö, þrjú ár tengist því beint að sú stefna var tekin af hálfu stjórnvalda að sveitarfélögin skyldu reka sig með halla og safna skuldum í gegnum faraldurinn. Þau voru hvött til fjárfestingar þrátt fyrir aukin útgjöld og vænt tekjufall.“
Annan mánuð í röð hætti Reykjavíkurborg í gær að gefa út skuldabréf á markaði. Viðmælendur ViðskiptaMoggans voru samhljóma um það að lítill áhugi hafi verið fyrir hendi af hálfu markaðsaðila um að taka þátt í fyrirhuguðu útboði borgarinnar.
Dagur sagði í fréttum Stöðvar 2 að Reykjavík væri á áætlun varðandi lánsfjármögnun og búna að sækja sjö af 21 milljarði sem taka eigi að láni á þessu ári. Miðað við aðstæður á markaði hafi fjármálasvið borgarinnar ekki ástæðu til að fara í skuldabréfaútboð að sinni.
Við þurfum ekki á þessum peningum að halda núna vegna þess að við vorum búin að gera aðrar ráðstafanir til að sækja fé eftir öðrum leiðum.
„Rykið er einfaldlega ekki sest eftir síðustu stýrivaxtahækkanir, eftir fjármálaáætlun ríkisstjórnarinnar. Við höfum trú á að það verði betra jafnvægi á markaðnum þegar líður á árið. Við þurfum ekki á þessum peningum að halda núna vegna þess að við vorum búin að gera aðrar ráðstafanir til að sækja fé eftir öðrum leiðum,“ sagði Dagur.
Reykjavíkurborg hefur nýtt alls níu milljarða króna af tólf milljarða lánalínum sem borgin hefur fengið frá Íslandsbanka og Landsbankanum síðustu sex mánuði. Borgin fullnýtti sex milljarða króna lánalínu frá Landsbankanum sem samþykkt var í október síðastliðnum til fjármögnunar fjármálaáætlun ársins 2022. Þá hefur borgin dregið þrjá milljarða af alls sex milljarða króna lánalínu Íslandsbanka sem samþykkt var í janúar, segir í frétt Morgunblaðsins.
Borgin er í mjög miklum fjárfestingum vegna þess að borgin væri að stækka. „Við erum að fara í nokkur nýbyggingarhverfi. Við erum í viðhaldsátaki í skólum. Við erum að fjölga leikskólaplássum mjög verulega. Erum einfaldlega að þjóna vaxandi borg. Það útheimtir fjárfestingar og fyrir því erum við að taka lán,“ sagði borgarstjóri við Stöð 2.
