Lof­samar síðasta púslið í Þórsliðið: „Guðs­gjöf“

„Vörnin í fyrri hálfleik skóp þetta fyrir okkur. Þegar við náum að tengja sókn og vörn vel saman spilum við mjög vel,“ sagði sýnilega sáttur Styrmir eftir leik.

„Það er gaman, mér líður alltaf vel í Garðabænum og þeir eru með hörkugott lið. Það er ekkert gefins í þessari deild og sigurinn því mjög góður.“

Þórsarar eru á leið í úrslitaleik um sjötta sætið í lokaumferðinni. Andstæðingurinn þar verður Grindavík. 

„Það verður spennandi leikur, leikurinn í fyrri umferðinni var skemmtilegur og „physical“ og ég býst við hörku leik.“

Vincent Malik Shahid var besti maður vallarins í kvöld, ekki í fyrsta sinn sem það gerist í vetur. Hann skoraði 38 stig og klikkaði einungis á fjórum skotum. Hann hefur sýnt að hann er einn albesti, ef ekki sá allra besti, leikmaður deildarinnar. En hvernig er að spila með honum?

„Það er frábært. Hann getur búið til sitt eigið skot upp úr engu og það er þægilegt þegar þú ert kominn í vesen í sókninni og hann býr bara til eitthvað. Hann gefur líka mikið af sér, sérstaklega til samfélagsins. Hann er bara frábær náungi.“

Síðasta púslið í Þórsliðið var koma Jordan Semple eftir áramót. Hann hefur komið ansi vel inn í liðið en margir settu spurningarmerki við Þórsara að fá hann í sínar raðir. Umræðan var neikvæð í garð Semple eftir veru hans hjá KR. Fengu leikmenn Þórs að segja eitthvað til um hvort Semple kæmi eða ekki?

„Ég man að við vorum í fjáröflun, vorum að blóðga fiska. Þá kemur Lalli upp að mér og segir við mig: Heyrðu, við ætlum að sækja Jordan.“

„Ég var búinn að heyra út í bæ að hann væri ekki góður. Svo kemur hann til okkar og er bara toppnáungi og hann er lykillinn að þessum varnarleik sem við erum að spila. Ég er þvílíkt ánægður með hann, bara guðsgjöf. Nákvæmlega rétta púslið sem við þurftum.“

Lalli, Lárus Jónsson sem þjálfar Þórliðið, var einnig spurður út í Semple í viðtali eftir leik. Var Lárus aldrei skeptískur þegar hann var að ákveða að taka Semple inn?

„Ég talaði bara við hann, og þegar ég var búinn að tala við hann í svona hálftíma var ég ekki í neinum vafa. Mér fannst skína í gegn að þetta væri körfuboltamaður sem hafði hrikalega mikinn áhuga á körfubolta og langaði að koma og hjálpa okkur.“

„Já,“ sagði Lárus einfaldlega þegar hann var spurður út í hvort Semple væri lykillinn að varnarleik Þórsara.

Í liði Þórsara er einnig Tómas Valur, sem er bróðir Styrmis. Styrmir var spurður hvernig væri að spila með yngri bróður sínum sem er feikilega efnilegur. „Bróðir minn er frábær og ég hef mjög gaman af því að spila með honum. Ég ætla njóta þess að fá að spila með honum nokkra leiki í viðbót.“

„Alla leið,“ var svo svarið sem Styrmir gaf þegar hann var spurður hversu langt Þórsarar gætu farið í úrslitakeppninni.