Í tilkynningu til Kauphallarinnar fyrr í kvöld kemur einnig fram að tilnefningarnefnd Íslandsbanka leggur til að Valgerður Skúladóttir, stofnandi og framkvæmdastjóri upplýsingatæknifyrirtækisins Sensa frá 2002, verði kjörin í stjórn bankans á aðalfundi hans um miðjan næsta mánuð. Tilnefningarnefnd bankans hefur það hlutverk að mæla með fjórum stjórnarmönnum í stjórnina, á meðan valnefnd Bankasýslunnar tilnefnir þrjá stjórnarmenn.
Miðað við fyrirliggjandi tillögur verða Agnar og Valgerður einu nýju stjórnarmennirnir. Koma þau í stað Herdísar Gunnarsdóttur, sem Bankasýslan hefur tilnefnt sem varamann, og Tanyu Zharov, aðstoðarforstjóra Alvotech, sem gaf ekki kost á sér til áframhaldandi stjórnarsetu en hún hafði verið stjórnarmaður í eitt ár.
Aðrir stjórnarmenn bankans eru Finnur Árnason, sem verður áfram formaður stjórnar, Anna Þórðardóttir, Guðrún Þorgeirsdóttir, Ari Daníelsson og Frosti Ólafsson.
Agnar lét af störfum hjá Kviku eignastýringu um mitt árið í fyrra eftir að hafa starfað þar um fjögurra ára skeið. Þar stýrði hann meðal annars sérhæfða skuldabréfasjóðnum IFIF en honum var slitið í kjölfar þess að Agnar lét af störfum. Hann var á meðal stofnenda GAMMA Capital og starfaði þar á árunum 2009 til 2018 en áður var hann skuldabréfamiðlari hjá Kaupþingi.
Á aðalfundi Íslandsbanka, sem fer fram 16. mars næstkomandi, verður meðal annars lagt til að greiða út 12,3 milljarða í arð til hluthafa, sem samsvarar um 50 prósent af hagnaði bankans á árinu 2022.
