Segir að þetta hús lyfti upp norðanverðum Vestfjörðum

Kristján Már Unnarsson skrifar 16. febrúar 2023 23:40

Húsið er risið í Bolungarvíkurhöfn. Við bryggjuna liggur flutningaskip sem er að flytja tækjabúnað fyrir vinnsluna. Hafþór Gunnarsson

Stærsta og afkastamesta laxvinnsla landsins rís núna í Bolungarvík á vegum Arctic Fish og á hún að taka til starfa í júní. Ráðamenn fyrirtækisins gera ráð fyrir að bara á síðari helmingi þessa árs verði unninn þar lax fyrir yfir fimmtán milljarða króna.

Í fréttum Stöðvar 2 mátti sjá flutningaskip í Bolungarvíkurhöfn en verið var að hífa úr því vinnslubúnað fyrir nýja laxasláturhúsið. Daníel Jakobsson hjá Arctic Fish segir að fjárfestingin í húsinu sé um fjórir milljarðar króna.

Daníel Jakobsson er framkvæmdastjóri hjá Arctic Fish.Hafþór Gunnarsson

„Það er risastór framkvæmd. Það er um fimm þúsund fermetrar að gólfflatarmáli,“ segir Daníel.

Tækin sem skipað var á land í gær eru annarsvegar blæðingartankur og hins vegar kælitankur og var þeim komið fyrir í húsinu. Mikil umsvif fylgja framkvæmdunum í Bolungarvík og hafa milli þrjátíu og fjörutíu manns unnið að uppbyggingunni þar frá því í fyrravor.

Tveir kranar á bryggjunni hífa stóran vélbúnað úr lest skipsins.Hafþór Gunnarsson

„Það skapast um fjörutíu ársverk þar og er bara eitt tæknivæddasta sláturhús í heimi, mikið af íslenskum búnaði þarna. Mjög tæknivætt og mikil sjálfvirkni þannig að þarna skapast mörg skemmtileg störf,“ segir Daníel.

Í fréttum í gær sáum við uppskipun úr norsku vinnsluskipi á Ísafirði á slægðum laxi sem slátrað var í Dýrafirði en um 3.500 tonn renna þar í gegn á þremur vikum, sem þykir mikið.

Um fjörutíu manns vinna þessa dagana að smíði hússins og uppsetningu innréttinga og tækjabúnaðar.Hafþór Gunnarsson

Húsið í Bolungarvík mun hins vegar afkasta 120 þúsund tonnum á ári, miðað við að starfsfólk vinni á einni vakt, en 240 þúsund tonnum, miðað við tvöfalda vakt, og verður þetta langafkastamesta hús sinnar tegundar í landinu.

„Frá því að við förum af stað þar núna um miðjan júní og út árið erum við að gera ráð fyrir að slátra þar um fimmtán þúsund tonnum.“

Útflutningsverðmæti slíks magns er yfir fimmtán milljarðar króna.

Húsið er um fimmþúsund fermetrar að flatarmáli.Hafþór Gunnarsson

Fyrst um sinn verður laxinum bæði slátrað í húsinu og hann slægður. Jafnframt er gert ráð fyrir flökunarvélum og þeim möguleika að þróa frekari úrvinnslu með stækkun hússins, en fyrirtækið hefur óskað eftir meira landrými með útvíkkun hafnargarðsins, að sögn Daníels.

„Og ég held að það verði gríðarleg upplyfting fyrir norðanverða Vestfirði að fá þessa atvinnugrein hér inn, á norðanverða Vestfirði,“ segir Daníel Jakobsson, framkvæmdastjóri hjá Arctic Fish.

Hér má sjá frétt Stöðvar 2:

Fiskeldi Bolungarvík Sjávarútvegur Ísafjarðarbær Skipaflutningar Efnahagsmál Byggðamál

Tengdar fréttir

Bæjarstýran hlýtur að vera ánægð að fá hafnargjöldin

Mikil umsvif hafa verið í Ísafjarðarhöfn og Dýrafirði undanfarnar vikur í kringum norskt fiskvinnsluskip, sem fengið var tímabundið til Vestfjarða til laxaslátrunar. Útflutningsverðmæti afurðanna úr þessu eina verkefni nemur þremur og hálfum til fjórum milljörðum króna.

15. febrúar 2023 22:42

Gátu ekki beðið lengur og keyptu nýbyggingu Fiskmarkaðsins

Arctic Oddi ehf., dótturfélag laxeldisfyrirtækisins Arctic Fish ehf. á Vestfjörðum, hefur keypt nýbyggingu Fiskmarkaðs Bolungarvíkur að Brimbrjótsgötu í Bolungarvík. Hyggst félagið koma upp laxasláturhúsi í byggingunni.

3. janúar 2022 13:45

Með sterkar skoðanir fyrir kosningar: „Laxeldi í bæinn og ekkert múður með það“

Karlarnir á bensínstöðinni vilja fiskeldi og atvinnutækifæri en konurnar á hjúkrunarheimilinu vilja búa í snyrtilegasta og fallegasta bæ á Vestfjörðum. Við kíktum til Bolungarvíkur og tókum púlsinn á bæjarbúum fyrir kosningar.

5. maí 2022 08:02

Kaffikarlar fyrir vestan segja tafir stofnanafólks óeðlilegar

„Það er alveg sama hvað við ætlum að reyna að fá. Við fáum aldrei neitt. Sérðu með laxeldið. Það eru bara einhverjir sportveiðimenn sem ráða því. Við viljum bara fá laxeldið í Djúpið,“ segir Pétur Runólfsson, einn karlanna sem við hittum að skrafi í Olís-búðinni í Bolungarvík.

9. mars 2022 23:15

Segir laxeldi stærsta tækifærið til að snúa við byggðaþróun á Vestfjörðum

Fiskeldi hefur tekið við af hefðbundnum sjávarútvegi sem stærsta atvinnugreinin á Tálknafirði. Helsti forystumaður Vestfirðinga um árabil segir laxeldið stærsta tækifæri fjórðungsins í atvinnumálum.

24. október 2019 21:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.