Hafa hægt á af­greiðslu um­sókna frá Venesúela vegna rann­sóknar­skyldu

Fréttastofa greindi frá því í gær að ferðaskrifstofa í Venesúela auglýsi ferðir til Íslands og gerir beinlínis út á sterkt velferðarkerfi.

Haft er eftir dómsmálaráðherra í Morgunblaðinu að honum finnist framferðið ömurlegt. Ísland bjóði upp á meiri vernd en aðrar Evrópuþjóðir og það virki sem segull.

Sjö milljónir Venesúelabúa eru nú á flótta vegna mannréttindakrísu í landinu.

Kærunefnd útlendingamála kvað upp úr um það í júlí í fyrra að veita ríkisborgurum frá Venesúela áfram viðbótarvernd vegna ástandsins heima fyrir.

Íris Kristinsdóttir er sviðsstjóri verndarsviðs Útlendingastofnunar.

„Við erum vissulega bundin af fordæmum nefndarinnar og höfum því ekki verið að synja neinum um alþjóðlega vernd síðan úrskurðurinn féll síðasta sumar en við höfum líka alveg verið að halda áfram með málavinnsluna í þessum málum. Við erum til dæmis að veita fylgdarlausum börnum vernd og við erum líka að synja einstaklingum sem eru kannski með dvalarleyfi í öruggu þriðja ríki.“

Málavinnsla og ákvarðanataka sé í gangi en stofnunin hefur þó hægt á vinnslunni.

„Við erum kannski ekki að afgreiða jafn hratt og við gerðum áður og það er fyrst og fremst vegna þess að við erum að skoða og rannsaka aðstæður í Venesúela vegna þess að það er alveg eitthvað sem hefur verið að breytast núna undanfarna mánuði og við þurfum að sinna okkar rannsóknarskyldu til þess að geta tekið upplýsta ákvörðun hverju sinni.“

En líkt og greint var frá fyrr í þessari frétt hafði Morgunblaðið eftir dómsmálaráðherra að Ísland veitti meiri vernd en aðrar Evrópuþjóðir. Íris segir að erfitt sé að fullyrða þar um því hún hafi ekki forsendurnar til þess að meta það.

„Sú niðurstaða sem fólk getur fengið er í rauninni alþjóðleg vernd og svo þessi viðbótarvernd sem hefur verið beitt hérna á Íslandi og svo mannúðarleyfi. Það hefur verið breytilegt milli landa hvernig niðurstaðan hefur verið. Við getum tekið dæmi um Spán sem eru aðallega að veita mannúðarleyfi. Svo eru önnur lönd sem eru bæði að veita viðbótarvernd, mannúðarleyfi eða synjun. Það er allur gangur svolítið á niðurstöðunum hjá löndunum í kringum okkur.“

Hún segir að hlutfallslega fleiri leiti til Íslands en hinna Norðurlandanna.

„Maður getur séð það á heimasíðum okkar systurstofnana en hver ástæðan er fyrir því er erfitt að segja til um. Þær geta verið margvíslegar en svo er það nú líka þannig að þegar fólk kemur til ákveðinna landa og fær vernd að þá er ekki óeðlilegt að fólk heyri í vinum og vandamönnum og útskýri að hér sé kannski gott að koma. Það eru alls konar hlutir sem geta komið til skoðunar.“

Auglýsingar eins og hjá ferðaskrifstofunni sé þekktur fylgifiskur í flóttamannamálum.

„Það er í rauninni alltaf áhætta sem fylgir því að fara á flótta og það er ekkert öðruvísi með þennan hóp en annan. Það eru alltaf einhverjir sem reyna að hagnýta sér fólk í viðkvæmri stöðu og það er okkar að fylgjast með því og lögreglunnar líka.“