Lið Hauks klárar tímabilið en framtíðin óráðin

Kielce á í fjárhagsvandræðum og hefur leitað logandi ljósi að styrktaraðilum undanfarnar vikur. Stærsti styrktaraðili Kielce, drykkjarvöruframleiðandinn Van Pur, hætti að styrkja félagið í byrjun þessa árs.

Mikið hefur verið rætt og ritað um framtíð Kielce og hvort liðið geti hreinlega klárað tímabilið heima fyrir og í Meistaradeild Evrópu. Á stjórnarfundi hjá Kielce í gær var ákveðið að ljúka tímabilinu en ákvörðun um framtíð félagsins yrði tekin í mars.

Búist er við miklum flótta frá Kielce eftir tímabilið. Ungversku meistararnir Pick Szeged ætla til að mynda að sæta lagi og hafa boðið Dujshebaev-fegðunum samninga. Talant Dujshebaev er þjálfari Kielce og synir hans, Alex og Daniel, leika með liðinu.

Haukur er samningsbundinn Kielce næstu árin. Hann er nú í endurhæfingu eftir að hafa slitið krossband í hné í leik með liðinu í desember.

Kielce hefur orðið pólskur meistari ellefu ár í röð. Þá vann liðið Meistaradeildina 2016.