Þetta kom fram í máli Halldórs Benjamíns Þorbergssonar í Bítinu á Bylgjunni skömmu fyrir klukkan átta.
Starfsmenn Íslandshótela sem eru í Eflingu hafa samþykkt boðun um verkfallsaðgerðir, en rafrænni atkvæðagreiðslu sem hófst á hádegi síðastliðinn þriðjudag lauk í gærkvöldi. Verkfall hefst í næstu viku, þriðjudaginn 7. febrúar, hafi samningar ekki náðst fyrir þann tíma.
Hlusta má á viðtalið í heild sinni í spilaranum að neðan.
„Algert reiðarslag“ fyrir forystu Eflingar
Halldór Benjamín segir að þessar niðurstöður, þar sem atkvæðagreiða beindist gegn hópi manna sem var sérvalinn af forystu Eflingar, hljóti að vera algert reiðarslag fyrir forystu Eflingar.
„Innan við 43 prósent atkvæðabærra manna, sem voru um 287, eru að samþykkja verkfallið. Þriðjungur er á móti. Auðvitað getum við alltaf gert ráð fyrir að verkfall sem er hannað með þessum hætti, eða atkvæðagreiðsla um verkfall, yrði samþykkt. En mig óraði ekki fyrir því að það gæti verið með svo veikum hætti.“
Hvernig lest þú í spilin og hvað næst?
„Ég get því deilt því með ykkur að Samtök atvinnulífsins munu höfða mál í dag gegn Eflingu vegna ólögmæts verkfalls. Og við munum höfða það mál fyrir Félagsdómi og gera grein fyrir því væntanlega í kringum hádegisbil eða svo,“ segir Halldór Benjamín.
Er það mál sem tæki þá fljótt að leysa út?
„Félagsdómur hefur sýnt í fortíð að hann er snöggur til verka. Aðalatriðið hér er að það er enginn hafinn yfir lög. Það á líka við um Sólveigu Önnu Jónsdóttur hjá Eflingu.“
Ef þið vinnið þetta mál, hvaða áhrif hefur það?
„Þá mun það hafa þau áhrif að til þessa verkfalls mun ekki koma.“
Þeir sem fara á svig við lög eiga ekki góðan málstað að verja
Halldór Benjamín segir að það verði líf og fjör á þessum vettvangi næstu daga. „Því get ég lofað ykkur. Og það verður ekki línuleg dagskrá. Það verða miklar vendingar á þessari leið.“
Hann segir okkur þó lifa í siðmenntuðu samfélagi.
„Efling hefur lýst því yfir að þau muni ekki hlíta miðlunartillögu ríkissáttasemjara. Munu ekki veita honum aðgang að atkvæðaskrá. Ég les í fréttum eins og þið að ríkissáttasemjara mun leita atbeina dómstóla að knýja á um það. En á endanum held ég að hver og einn Íslendingur þurfi að líta í spegil. Það er eitt sem við getum verið sammála um – að við búum í réttarríki og enginn er hafinn yfir lög. Þeir sem reyna að fara á svig við lögin hafa yfirleitt ekki góðan málstað að verja. Mér virðist sem að Efling sé í því hlutverki um þessar mundir,“ segir framkvæmdastjóri Samtaka atvinnulífsins.
66 prósent þátttaka
Verkfallsboðun Eflingar var samþykkt með 124 atkvæðum, 58 voru á móti og sjö tóku ekki afstöðu. Af þeim sem greiddu atkvæði voru því 65 prósent á því að fara í verkfall. Á kjörskrá voru 287 og af þeim greiddu 189 atkvæði. Kjörsóknin var því 66 prósent sem Efling segir að sé mun meira en sést hafi í viðlíka atkvæðagreiðslum félagsins á síðustu árum.
