Viðskipti innlent

Verð­bólga mælist 9,9 prósent

Tryggvi Páll Tryggvason skrifar
Verðbólgan hefur áhrif á aðgerðir Seðlabankans, sem hefur áhrif á húsnæðismarkaðinn.
Verðbólgan hefur áhrif á aðgerðir Seðlabankans, sem hefur áhrif á húsnæðismarkaðinn. Vísir/Vilhelm

Verðbólga síðustu tólf mánaða er enn á uppleið. Mælist hún nú 9,9 prósent en stóð í 9,6 prósent í síðasta mánuði og 9,3 próent í mánuðinum þar á undan.

Þetta kemur fram í uppfærslu Hagstofunnar á vísitölu neysluverðs  sem birt var í morgun. Verðbólga mældist síðast svo há í júlí, þá einnig 9,9 prósent. 

Þar segir að vísitala neysluverðs, miðuð við verðlag í desember, sé 569,6 stig og hækki um 0,85 prósent frá fyrri mánuði. Vísitala neysluverðs án húsnæðis er 470,9 stig og hækkar um 0,88 prósent frá desember 2022.

Verð á mat- og drykkjarvörum hækkaði um 2,0 prósent (áhrif á vísitöluna 0,30 prósent). Hluti af þeirri hækkun skýrist af hækkun á mjólk, ostum og eggjum um 4,4 prósent (0,12 prósent). Áfengi og tóbak hækkaði um 5,5 prósent (0,13 prósent), hitaveita hækkaði um 6,0 prósent (0,12 prósent), nýir bílar hækkuðu um 9,8 prósent (0,52 prósent) og veitingar um 2,4 prósent (0,11 prósent), að því er fram kemur á vef Hagstofunnar.

Vetrarútsölur eru víða í gangi og lækkuðu föt og skór um 8,4% (-0,29%), húsgögn og heimilisbúnaður um 4,4% (-0,10%) og raftæki um 6,2% (-0,12%). Einnig lækkuðu flugfargjöld til útlanda um 9,4% (-0,20%).

Síðastliðna tólf mánuði hefur vísitala neysluverðs hækkað um 9,9 prósent, sem fyrr segir, og vísitala neysluverðs án húsnæðis um 8,3%.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×