Lokað milli Víkur og Kirkju­bæjar­klausturs og ó­vissu­stig á Hellis­heiði

Í tilkynningu á vef Vegagerðarinnar eru vegfarendur hvattir til að kynna sér aðstæður vel áður en lagt er af stað. Mikil úrkoma á sjálfri jólanótt hefur spillt færð víða um land. 

Gul veðurviðvörun tekur gildi á Suðausturlandi klukkan 14 í dag og gildir til klukkan 10 á morgun, annan í jólum. Búist er við norðan stormi, 18 til 25 metrum á sekúndum og snörpum vindhviðum við fjöll. Ástandið verður varhugavert fyrir bíla sem taka á sig mikinn vind.

Hálka er á Reykjanesbraut en þæfingsfærð eða þungfært á nokkrum leiðum, meðal annars Mosfellsheiði og Suðurstrandarvegi.

Á Norðurlandi er þæfingsfærð á Vatnsskarði og í Skagafirði en þungfært á Öxnadalsheiði. Snjóþekja eða hálka á öðrum leiðum og víða skafrenningur eða éljagangur.

Á Austurlandi er hálka á flestum leiðum og ófært á Öxi og Breiðdalsheiði. Á Vestfjörðum er víða ófært, þungfært eða þæfingsfærð.

Þá segir í færslu lögreglunnar í Vestmannaeyjum að þar séu götur ófærar.