Körfubolti

Slæm staða KR og Þórs: Fjórtán síðustu lið hafa fallið eftir svona slaka byrjun

Óskar Ófeigur Jónsson skrifar
Jordan Semple er að skora yfir 20 stig að meðaltali í leik fyrir KR.
Jordan Semple er að skora yfir 20 stig að meðaltali í leik fyrir KR. Vísir/Bára

KR og Þór Þorlákshöfn hafa unnið alla Íslandsmeistaratitla frá árinu 2014 nema einn. Nú sitja þau hins vegar hlið við hlið í fallsæti og saga liða í þeirra stöðu er ekki falleg.

Eini sigur KR er í leik sínum á móti Þór og því þurfa Þorlákshafnarmenn að sitja í neðsta sætinu.

Eini sigur Þórs er endurkomusigur á móti Keflavík. Bæði liðin hafa tapað hinum sjö leikjum sínum og nú þurfa þau bæði tvo sigra til að sleppa úr fallsæti.

Höttur og ÍR eru fjórum stigum fyrir ofan þau og það sem meira er að þau eru líka betri í innbyrðis leikjum. Bæði KR og Þór þurfa því í raun sex stig til að sleppa úr fallsæti er þrefalt fleiri sigra en þau hafa unnið í fyrstu átta umferðunum.

Útlitið er því mjög dökkt bæði í Vesturbænum og í Þorlákshöfn og bláköld staðreynd málsins er gengi liða í sömu stöðu undanfarin ár.

Frá og með keppnistímabilinu 2011-12 hafa fjórtán lið aðeins unnið unnið einn leik eða færri í fyrstu átta umferðunum. Þau eiga það öll sameiginlegt að hafa fallið úr deildinni um vorið. Tíu af þeim hafa endað í neðsta sæti deildarinnar.

Frá hruni hefur aðeins eitt lið náð að bjarga sæti sínu eftir svo slæma byrjun en það var lið ÍR tímabilið 2010 til 2011. ÍR-ingar töpuðu þá sjö af fyrstu átta leikjum sínum.

ÍR-ingar unnu sinn annan sigur í níunda leik og voru komnir með þrjá sigra fyrir áramót. Þeir komust hins vegar alla leið upp í sjötta sætið með því að vinna sjö af ellefu leikjum sínum eftir áramót.

Miklu munaði um komu James Bartolotta eftir áramótin en hann var með 22,5 stig og 3,6 stoðsendingar í leik og setti niður 49 prósent þriggja stiga skota sinna. Miklu munaði líka að fá Sveinbjörn Claessen aftur inn í liðð en ÍR-liðið tapaði fyrstu fimm leikjum tímabilsins án hans.

Hér fyrir neðan má sjá þessi fjórtán lið sem hafa staðið í sömu sporum og KR-ingar og Þórsarar í dag.

  • Síðustu lið sem hafa byrjað 1-7 eða 0-8:
  • KR 2023 1-7 (???)
  • Þór Þorl. 2023 1-7  (???)
  • Þór Ak. 2022 0-8 FALL (12. sæti)
  • Haukar 2021 1-7 FALL (12.)
  • Fjölnir 2020 1-7 FALL (12.)
  • Þór Ak. 2020 0-8 FALL (11.)
  • Breiðablik 2019 1-7 FALL (12.)
  • Höttur 2018 0-8 FALL (12.)
  • Snæfell 2017 0-8 FALL (12.)
  • FSu 2016 1-7 FALL (11.)
  • Höttur 2016 0-8 FALL (12.)
  • Skallagrímur 2015 1-7 FALL (12.)
  • KFÍ 2014 1-7 FALL (11.)
  • Valur 2014 1-7 FALL (12.)
  • Tindastóll 2013 1-7 FALL (11.)
  • Valur 2012 0-8 FALL (12.)



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.