Lífið

„Þó svo að þú sért lítil þýðir það ekki að þú getir ekki verið stærri manneskjan“

Dóra Júlía Agnarsdóttir skrifar
Elenora Rós Georgsdóttir er viðmælandi vikunnar í Innblæstrinum.
Elenora Rós Georgsdóttir er viðmælandi vikunnar í Innblæstrinum. Instagram @elenorarosgeorgs

Bakarinn Elenora Rós Georgsdóttir er lífskúnstner mikill sem segist stanslaust upplifa sig sem eina stóra tilfinningasprengju. Hún gaf út bókina Bakað meira á dögunum og sækir meðal annars innblástur í sæt bakarí og fallega staði. Elenora er viðmælandi vikunnar í Innblæstrinum.

Innblásturinn er fastur liður hjá Lífinu á Vísi þar sem rætt er við ólíkt fólk um hvað veitir því innblástur í tilverunni og hvaða ráðum þau luma á varðandi andlega heilsu.

Hver ert þú í þínum eigin orðum?

Ég er almennt algjört fiðrildi, lífsglöð, ákveðin og þrautseig. 

Bakari, lítil kona sem elskar ekkert meira en fólkið sitt og er stanslaust ein stór tilfinningasprengja.

Hvað veitir þér innblástur?

Allt í kringum mig. Litir, náttúran, fólkið mitt, fallegir staðir, sæt bakarí og allskonar gordjöss á Internetinu.

Hvað er þitt besta ráð til að næra andlega heilsu?

Ó, ég á svo mörg. Það er erfitt að velja en það er fátt sem ég hugsa meira um en andlega heilsan hjá mér og fólkinu í kringum mig. 

Efst á listanum mínum er að fara í jóga, fara til sálfræðings, umkringja sig með fólki sem lyftir manni upp og drífur mann áfram og að leyfa sér að dreyma stórt.

Hvernig er hefðbundinn dagur í þínu lífi?

Það er engin dagur eins en þannig finnst mér það best. 

Ég hins vegar er algjör A manneskja, ég byrja daginn alltaf snemma, fer svo annað hvort í mína klassísku vinnu eða að brasa í öðru eins og bókinni minni eða hliðar verkefnum. 

Kem svo heim, fæ mér kvöldmat og á smá rólega stund með sjálfri mér en ég elska að eiga smá tíma með mér sjálfri. Svo fer ég oft og hitti fólkið mitt eða fæ það til mín í kósý. Sumir dagar enda á jóga eða næs kvöldgöngu en allir dagar enda á góðri húðumhirðu.

Uppáhalds lag og af hverju?

Slipping through my fingers með ABBA. Einfaldlega fallegasta lag allra tíma og einnig er ég mikill Mamma Mia aðdáandi.

Uppáhalds matur og af hverju?

Allt ítalskt eins og pasta, burrata og góð súrdeigspizza.

Besta ráð sem þú hefur fengið?

Nú er ég mjög smávaxin og einn daginn var ég að eiga í smá rökræðum við mann sem var mun eldri en ég. 

Ég fór og ræddi málið við vin minn og hann sagði: „Elenora, þó svo að þú sért lítil þýðir það ekki að þú getir ekki verið stærri manneskjan.“ 

Og ég hef aldrei gleymt þessum orðum síðan þá.

Hvað er það skemmtilegasta við lífið?

Bæði að geta dreymt svona stórt og sótt öll þau tækifæri sem mann langar í. 

Einnig að fá að elska svona mikið af dásamlegu fólki og upplifa tilfinninguna þegar hjartað er bókstaflega að springa úr þakklæti gagnvart fólkinu í kringum mig.

Tengdar fréttir

Var alltaf feiminn í æsku

Arnar Gauti Arnarsson er með sanni betur þekktur sem Lil Curly og hefur náð gríðarlegum fylgjendafjölda á samfélagsmiðlum á borð við TikTok og Instagram. Arnar Gauti var feiminn sem krakki en hefur með aldrinum sigrast á því með lífsmottóinu sínu. Hann er viðmælandi vikunnar í Innblæstrinum.

Finnur æðruleysi í lægðunum

Tónlistarmaðurinn, leikarinn og lífskúnstnerinn Júlí Heiðar átti öfluga endurkomu inn í íslenskt tónlistarlíf á síðasta ári þegar hann sendi frá sér lagið Ástin heldur vöku sem sat meðal annars í fyrsta sæti Íslenska listans á FM957. Hann var að senda frá sér lagið Hærra og nýtir tónlistina sem tjáningarform. Júlí Heiðar er viðmælandi vikunnar í Innblæstrinum.

„Lífið snýst ekki lengur um að skara fram úr og vinna alla daga“

„Allir héldu að þetta væri bara einhver tímabundinn draumur. En ég var alveg staðráðin í þessu og hjartað sló fast fyrir þetta,“ segir hin dugmikla, jákvæða og 21 árs gamla Elonora Rós í viðtali í Bakaríinu á Bylgjunni síðasta laugardag. 






Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.