Innlent

Æskuheimili Ólafs Ragnars nýtt til ræktunar alþjóðlegs fræðanets

Heimir Már Pétursson skrifar
Íbúðin er í bláa húsinu við Túngötu 3 á mjög góðum stað í bænum.
Íbúðin er í bláa húsinu við Túngötu 3 á mjög góðum stað í bænum. Stöð 2/Ívar

Alþjóðlegu fræðaneti var ýtt úr vör á fyrsta málþingi stofnunar Ólafs Ragnars Grímssonar á Ísafirði í dag. Innlendir og erlendir fræðimenn geta starfað á æskuheimili forsetans fyrrverandi í bænum í samstarfi við Háskólasetur Vestfjarða og háskólanna í Reykjavík og á Akureyri.

Katrín Jakobsdóttir forsætisráðherra var meðal þeirra sem ávörpuðu málþingið sem fór fram í Háskólasetri Vestfjarða, ásamt Ólafi Ragnari Grímssyni, Örnu Láru Jónsdóttur bæjarstjóranum á Ísafirði, Peter Weiss forstöðumanni háskólasetursins og Guðmundi F. Sigurjónssyni forstjóra líftæknifyrirtækisins Kerecis.

Rektorar háskólanna í Reykjavík, HÍ og HR og á Akureyri mættu á fyrsta málþing stofnunarinnar í dag enda styðja háskólarnir við rekstur fræðasetursins.

Fræðimenn alls staðar að úr heiminum geta dvalið hér á æskuheimili Ólafs Ragnars Grímssonar við Túngötu 3 í tvær til sex vikur. Það er von manna að þannig verði til tengslanet fræðimanna um allan heim.

Ólafur Ragnar keypti fyrir nokkru helming þess hús sem faðir hans byggði fyrir tæpum hundrað árum og leggur íbúð í því til fræðasetursins.

Stofnun Ólafs Ragnars Grímssonar tók formlega til starfa í fyrra. Á næstu árum verður reist hús fyrir hana á lóð Háskóla Íslands en fyrsta málþing stofnunarinnar var á Ísafirði í dag.Stöð 2/Ívar

„Nú verður þetta heimkynni alþjóðlegra og íslenskra fræðimanna. Þannig að ég vona að þetta gamla hús hér í Túngötunni verði öflugt framlag til að efla vísindi og þekkingarsköpun. Samræður um vandamál veraldar hér fyrir vestan," segir Ólafur Ragnar.

Þetta verði vísindamenn á öllum sviðum bæði raun- og félagsvísinda sem hefðu tengsl við norðurlóðir og loftslagsmálin. Svo hefði sú hugmynd kviknað í samtali við forsætisráðherra að kannski ættu rithöfundar að geta nýtt sér fræðasetrið líka.

„Og skrifað jafnvel glæpasögur. En ég sagði að það væri að vísu skilyrði að næsta glæpasaga forsætisráðherrans héti Ísafjörður. Þar sem sú fyrsta var kennd við Reykjavík,“ segir forsetinn fyrrverandi kankvís.

Katrín Jakobsdóttir forsætisráðherra segir mikilvægt að rannsóknir fari fram um allt land enda væri þekking orðin ein megin útflutningsgrein Íslendinga.Stöð 2/Ívar

Ólafur Ragnar segir að fyrstu fræðimennirnir verði mættir á æskuheimilið um mitt næsta ár. Forsætisráðherra segir mikilvægt að rannsóknir eigi sér stað um allt land.

„Þetta er auðvitað ákveðin undirstöðu atvinnugrein. Þetta er undirstöðugrein í okkar útflutningi núna; það er þekkingargeirinn. Það er alger forsenda fyrir því að landið allt sé virkt í nýsköpun og rannsóknum. Þannig að það skiptir gríðarlega miklu máli,“ sagði Katrín.

Peter Weiss forstöðumaður Háskólasetursins á Ísafirði segir mikinn feng í því að fá fræðimannasetur sem tengist setrinu í bænum.Stöð 2/Ívar

Og Peter Weiss forstöðumaður Háskólasetursins er ekki í nokkrum vafa um að fræðasetrið verði mikil lyftistöng fyrir háskólasetrið og bæinn. Með þessu muni með tímanum byggjast upp mikið samskiptanet.

„Það er mikil búbót. Við vinnum mikið með norðurslóðamál, mikið með alþjóðlegu samstarfsneti. Ég er alveg viss um að allir nemendur hjá okkur og kennarar bíða bara eftir því að vera í samskiptum við þessa „fellows" eða fræðimönnum sem dvelja í Grímshúsi," segir Peter.

En þeir vísindamenn sem dvelja í Grímshúsi verða það sem á enskunni er kallað „fellows“, einhvers konar samherjar háskólasetursins.

Ólafur Ragnar segir að með því að leggja hluta af húsi foreldra sinna undir fræðasetrið væri hann bæði að þakka bænum og foreldrum sínum fyrir það veganesti sem hann fékk.Stöð 2/Ívar

Ólafur Ragnar segist ekki líta á þetta sem upphefð fyrir sig.

„En ég er kannski með því að leggja þetta hús fram sem dvalarstað og styðja þannig að áframhaldandi uppbyggingu Ísafjarðar, að reiða fram ákveðna þakkarskuld af minni hálfu. En líka í minningu foreldra minna og þeirrar miklu sögu sem tengist þessu húsi,“ segir Ólafur Ragnar Grímsson.

Húsið var fyrst flutt inn sem einingarhús upp úr aldamótunum nítján hundruð og reist fyrir hvalfangara inni í Ísafjarðardjúpi. Grímur faðir forsetans fyrrverandi reisti það síðan aftur á Ísafirði.


Tengdar fréttir

Fræða­fólki býðst að dvelja á æsku­heimili Ólafs Ragnars

Erlendum og íslenskum vísindamönnum, sérfræðingum og fræðafólki verður boðið að dvelja í tvær til sex vikur í Grímshúsi á Ísafirði. Grímur Kristgeirsson, faðir Ólafs Ragnars Grímssonar fyrrverandi forseta, reisti húsið árið 1930.

Ný al­þjóð­leg hug­veita um frið og vel­megun stað­sett í Reykja­vík

Tilkynnt var á Hringborði norðurslóða í dag að ný alþjóðleg hugveita um frið og velmegun á norðurslóðum verði með höfuðstöðvar sínar í Reykjavík. Forstöðumaður hennar segir að þróun og fjárfestingar eigi ætíð að fara fram í samvinnu við frumbyggja og taka mið af þeirra þörfum og menningu. Dorrit Moussaieff ætlar að sofa í tjaldi við Hörpu í nótt til að vekja athygli á málefnum norðurslóða.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.