Úr­skurðaðir í á­fram­haldandi gæslu­varð­hald

Mennirnir tveir voru handteknir fyrir níu vikum síðan í umfangsmiklum aðgerðum lögreglunnar um allt höfuðborgarsvæðið. Ljóst er að vikurnar í gæsluvarðhaldi verða að minnsta kosti ellefu eftir að héraðssaksóknari samþykkti að framlengja gæsluvarðhald þeirra um tvær vikur. Fréttablaðið greinir frá þessu. 

Í samtali við fréttastofu í gær sagði Karl Ingi Vilbergsson, saksóknari hjá embætti héraðssaksóknara, að rannsókn á meintum brotum mannanna sé langt á veg komin. Annars vegar beinist rannsóknin á brotum á almennum hegningarlögum hvað varðar hryðjuverk og hins vegar brotum á vopnalögum. 

Sveinn Andri Sveinsson, lögmaður annars þeirra, segir í samtali við Fréttablaðið að hann ætli að kæra úrskurðinn til Landsréttar. Hann telji skjólstæðing sinn ekki vera hættulegan samfélaginu. 

Einar Oddur Sigurðsson, lögmaður hins mannsins, segir að hann sé ekki sáttur með úrskurðinn. Honum hafi verið lofað fyrir síðasta gæsluvarðhaldsúrskurð að rannsókn málsins yrði lokið áður en gæsluvarðhaldið rynni út. Ljóst er að þær fullyrðingar hafa ekki staðist.