Golf

„Ég lifði mig alla leið inn í þetta og veit hvað þetta er ljúft“

Óskar Ófeigur Jónsson skrifar
 Birgir Leifur Hafþórsson og Ólafía Þórunn Kristinsdóttir hafa komist lengst af íslenskum kylfiingum.
 Birgir Leifur Hafþórsson og Ólafía Þórunn Kristinsdóttir hafa komist lengst af íslenskum kylfiingum. GSÍ myndir

Guðmundur Ágúst Kristjánsson, atvinnukylfingur úr GKG, náði þeim frábæra árangri í gær að tryggja sér keppnisrétt á sterkustu atvinnumótaröð Evrópu í karlaflokki, DP World Tour.

Guðmundur Ágúst er aðeins annar íslenski kylfingurinn sem nær þessum árangri en Birgir Leifur Hafþórsson, náði tvívegis að komast í gegnum lokaúrtökumótið á Evrópumótaröðinni. Fyrst árið 2006 og aftur ári síðar.

Svava Kristín Gretarsdóttir ræddi við Birgir Leif um spurði hann hvort hann hafði verið að fylgjast með Guðmundi á úrtökumótinu.

„Já heldur betur. Ég skil það núna hvað það er að vera spenntur hinum megin við borðið og nánast eyðileggja refresh takkann á tölvunni og símatækinu sínu. Á einum fundi þá sagði ég: Ég verð að fá að sjá þetta en þá átti hann tvær holur eftir,“ sagði Birgir Leifur Hafþórsson.

„Ég lifði mig alla leið inn í þetta og veit hvað þetta er ljúft. Ég veit hvernig honum líður í dag því það er mikið spennufall og verður það næstu daga,“ sagði Birgir Leifur.

Þetta var sex daga törn hjá Guðmundi. Hann var búinn að spila þetta mjög vel en var Birgir Leifur einhvern tímann stressaður að hausinn færi hjá honum.

„Nei. Ég veit hvað í honum býr og þessi golfvöllur hentar honum mjög vel. Hann er með þannig leik að honum líður ágætlega á þessum velli. Ég sá líka hvað hann er búinn að leggja inn í þetta. Hann er búinn að vera duglegur að æfa og leggja allt í þetta,“ sagði Birgir.

„Ég vissi það að þegar hann fengi smjörþefinn þá hafði ég þetta alltaf á tilfinningunni. Auðvitað hefði maður orðið rosalega svekktur af því að það mátti ekki mikið út af bregða. Það getur allt gerst í íþróttum,“ sagði Birgir

„Ég vissi það að ef það myndi gerast þá myndi það ekki vera hausinn heldur óheppnismistök eða eitthvað. Ég hafði alltaf trú á þessu,“ sagði Birgir.

Hversu stórt er það að komast inn á Evrópumótaröðina?

„Þetta er frábært skref og risastórt skref fyrir íslenskt golf. Við erum enn þá ung þjóð í þessu að ég hafi verið sá fyrsti og við séum að fá aftur mann inn þá sýnir það að við erum bara að taka þessu fyrstu skref. Vonandi tekur hann þetta enn þá lengra og fleiri sem fylgja í kjölfarið. Haraldur [Franklín] komi bara strax á eftir og Bjarki [Pétursson],“ sagði Birgir.

„Svo að yngri kynslóðin sjái að þetta er að verða möguleiki. Þetta væri ekkert hægt nema með stuðningsaðilunum eins og Forskot sem er alveg ómetanlegt fyrir þessa krakka,“ sagði Birgir.

Það má hlusta á allt viðtalið hér fyrir neðan.

Klippa: Viðtal við Birgi Leif Hafþórsson um afrek Guðmundar



Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.