Vikan framundan: Níu skráð félög birta uppgjör vegna þriðja ársfjórðungs
Ritstjórn Innherja skrifar
Síminn heldur hluthafafund á miðvikudag.vísir/vilhelm
Uppgjör skráðra félaga fyrir þriðja fjórðung yfirstandandi árs halda áfram að birtast þessa dagana. Alls munu níu skráð félög birta uppgjör í vikunni. Síminn heldur hluthafafund á miðvikudag þar sem fyrir liggur tillaga stjórnar félagsins um ráðstöfun söluhagnaðar Mílu.
Síminn birtir uppgjör fyrir þriðja ársfjórðung eftir lokun markaða á þriðjudag. Sama dag birtir Hagstofan upplýsingar um þróun fasteignamarkaðar eftir landshlutum.
Festi og Arion banki birta uppgjör eftir lokun markaða á miðvikudag. Í eftirmiðdaginn hefur verið boðað til hluthafafundar Símans þar sem tekin verður ákvörðun um greiðslu til hluthafa í kjölfar sölunnar á Mílu upp á 31,5 milljarð króna.
Fram kom í tilkynningu Símans til kauphallarinnar 30. september síðastliðinn að Síminn hefði fengið greitt að fullu fyrir Mílu, annars vegar 32,7 milljarða króna í reiðufé og hins vegar 17,5 milljarða króna í formi skuldabréfs til þriggja ára.
Fimmtudagurinn verður stór í þessari viku. Hagstofan birtir verðbólgutölur fyrir október um morguninn. Væntingar flestra markaðsaðila standa til þess að dragi úr verðlagshækkunum í mánuðinum.
Eftir lokun markaða sama dag birta sex félög uppgjör fyrir þriðja fjórðung: Íslandsbanki, Sjóvá, SKEL, Origo, Nova og Eik.
Þróun fasteignamarkaðar, uppgjör Icelandair og stjórnarkjör á hluthafafundi Sýnar er meðal þess sem markaðurinn mun fylgjast með í vikunni.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
