StebbiC0C0 með 50 fellur í fjórfaldri framlengingu gegn Fylki

Snorri Rafn Hallsson skrifar 14. október 2022 15:01

Dusty og Fylkir mættust í Nuke og Fylkir hafði betur í hnífalotunni og byrjaði í vörn. Fylkir vann fyrstu lotuna þar sem Brnr og Gvendur voru báðir með tvær fellur. Detinate jafnaði leika um hæl fyrir Dusty með góðu einstaklingsframtaki og Dusty tryggði sér næstu tvær loturnar eftir það einnig.

Þannig gekk leikurinn í fyrri hálfleik. Fylkir krækti í lotur hér og þar en Dusty var með bæði töglin og hagldirnar á leiknum. Detinate og StebbiC0C0 röðuðu inn fellum til að vinna einvígin og ná góðu forskoti.

Staða í hálfleik: Dusty 10 – 5 Fylkir

Síðari hálfleikur spilaðist alveg öfugt. Þá var það Dusty sem tókst ekki að tengja saman lotur en í hvert sinn sem Fylkir vann lotu bættu þeir að minnsta kosti einni við. Snær og LeFluff, sem var á vappa, áttu flestar fellur fyrir Fylki og opnuðu kortið fyrir aðra leikmenn. Smám saman fjaraði því undan forskoti Dusty sem voru blankir allan hálfleikinn.

Í þrítugustu lotu vann LeFluff vappaeinvígið við Thor og endaði öll ábyrgðin á herður StebbaC0C0 sem var einn gegn þremur og þurfti að vinna til að leikurinn færi ekki í framlengingu. LeFluff náði honum eftir að snær kom sprengjunni fyrir og því þurftu liðin að halda áfram að spila. Og það gerðu þau svo sannarlega.

Staða eftir venjulegan leiktíma: Dusty 15 – 15 Fylkir

Það var ekki bara ein framlenging sem þurfti til heldur heilar fjórar. Ekkert skildi á milli liðanna í þessari lönguvitleysu fyrr en í 54. lotu. Reykveggur Fylkis klikkaði svo þeir gátu ekki sótt hratt inn. Tíminn leið en Snær náði þrefaldri fellu áður en StebbiC0C0 felldi hann á sprengjusvæðinu. LeFluff og Gvendur voru tveir gegn StebbaC0C0 og Thor í Dusty sem að lokum höfðu betur í þessum tæpasta leik tímabilsins.

Lokastaða: Dusty 28 – 26 Fylkir

Dusty eru enn ósigraðir, nú með 10 stig eftir þennan lengsta leik tímabilsins. Fylkir gælir við botnsætin með einungis einn sigur og 2 stig á tímabilinu.