Mörkin of lítil í leik Ajax og Arsenal: „Aldrei upp­lifað annað eins“

Arsenal vann 1-0 útisigur á Ajax í síðari leik liðanna í hreinum úrslitaleik um sæti í riðlakeppni Meistaradeildarinnar. Fyrri leik liðanna lauk með 2-2 jafntefli en Vivianne Miedema skoraði eina mark liðsins og sá til þess að liðið mun leika í deild þeirra bestu framan af vetri.

Það var þó annað mál sem stóð upp úr þegar hinn sænski Eidevall mætti á blaðamannafund að leik loknum.

„Þetta hefur verið mjög undarleg upplifun hérna. Að spila gegn Ajax, sem er stórt félag, og þurfa að mæla mörkin fyrir leik. Ég hef aldrei upplifað neitt þessu líkt. Þetta er mjög skrítið en við getum aðeins stjórnað þeim hlutum sem við höfum stjórn á,“ sagði Svíinn að leik loknum.

Evrópumeistarinn Beth Mead fór meidd af velli og Eidevall virtist ekki sáttur með dómara leiksins. Hann taldi að Mead gæti komið af velli þar sem hún væri með heilahristing og annar leikmaður gæti komið inn í hennar stað.

Það var ekki hægt þar sem þjálfarinn hafði notað alla þrjá gluggana sem skipta má leikmönnum inn á og Knattspyrnusamband Evrópu, UEFA, er ekki með sömu reglur og er í gildi á Englandi. Þar má leikmaður koma inn af bekknum ef talið er að leikmaðurinn sem er að koma út af sé með heilahristing.

„Við fáum ekkert gefins á vellinum. Það er dæmt á okkur í gríð og erg en við fáum aldrei dæmt okkur í hag fyrir eins brot. Þetta hafa verið erfiðar 90 mínútur, sérstaklega miðað við hvað hefur verið leyft. Því miður kemur það mér ekki á óvart að koma út úr einvíginu með tvo meidda leikmenn.“

„Það var enginn vafi að Mead þurfti að koma af velli. Vandamálið frá mér séð er að ég spurði fjórða dómara hvort við mættum gera skiptingu vegna höfuðáverka og hún sagði já. Við vorum að gera Linu Hurtig klára til að koma inn á í tvær til þrjár mínútur og þá allt í einu segir fjórði dómari að við megum ekki gera skiptinguna.“

„Við hefðum getað notað þann tíma í að skipuleggja hvernig við ættum að verjast með tíu leikmenn. Þessi misskilningur, ég skil svo lítið. Þetta er svo einföld já eða nei spurning,“ sagði Eidevall einnig áður en hann bætt við að tæklingin á Mead hefði verðskuldað rautt spjald.

„Ég vona bara að það sé í lagi með Mead,“ sagði hinn 39 ára gamli Eidevall að endingu.