„Þetta eru bestu fé­laga­skiptin í sumar“

Andri Már var frábær í liði Hauka þegar liðið fékk KA í heimsókn á Ásvelli í fyrstu umferð deildarinnar. Hann skoraði fimm mörk og gaf sex stoðsendingar. Telur Seinni bylgjan að þetta geti breytt öllu fyrir Hauka.

„Það er neyðarfundur hjá Seinni bylgjunni strax í kvöld,“ sagði Arnar Daði Arnarsson, annar af sérfræðingum þáttarins áður en hinn, Theodór Ingi Pálmason greip boltann:

„Fínt þá að vera með endurskoðanda í setti,“ sagði Theodór Ingi og glotti við tönn.

„Eins og ég segi, þetta er leikmaður sem er að koma úr þýsku úrvalsdeildinni. Hann fékk fá tækifæri núna en spilaði mikið í upphafi síðasta tímabils þegar það voru meiðsli hjá Stuttgart. Svo koma leikmenn til baka, það verða þjálfarabreytingar og miklar breytingar á liðinu svo tækifærin voru af skornum skammti,“ sagði Arnar Daði og hélt áfram.

„Þetta er topp tíu besti leikmaðurinn í deildinni og án þess að skafa eitthvað af því og setja einhverja meiri pressu þá er hann kominn hingað og ætlar að taka yfir deildina. Að hann sé kominn inn á eftir ellefu mínútur - þetta eru tvær æfingar - það lýsir stöðunni á Haukaliðinu á þeim tíma.“

„Þetta eru bestu félagaskiptin í sumar,“ sagði Arnar Daði að endingu. Innslagið í heild sinni má sjá hér að neðan.