Íþróttadeild Vísis og Stöðvar 2 Sports spáir fyrir um gengi liðanna í Olís-deild kvenna en keppni í deildinni hefst á morgun, fimmtudaginn 15. september.
Íþróttadeild spáir Fram 3. sæti Olís-deildar kvenna í vetur og að Íslands- og deildarmeistararnir fari niður um tvö sæti milli tímabila.
Fram vann tvo af þremur stóru titlunum sem voru í boði á síðasta tímabili. Frammarar urðu deildarmeistarar og svo Íslandsmeistarar leiddir áfram af frábærum leik Karenar Knútsdóttur.
Stefán Arnarson er að hefja sitt níunda ár sem þjálfari Fram og líklega hefur hann ekki áður staðið frammi fyrir jafn mörgum ósvöruðum spurningum fyrir tímabil. Fyrir það fyrsta er Fram-liðið svo gott sem skyttulaust eins og staðan er núna.
Hildur Þorgeirsdóttir er hætt, óvíst er hvenær Ragnheiður Júlíusdóttir snýr aftur og Kristrún Steinþórsdóttir er meidd. Fram ku þó vera nálægt því að semja við tvær erlendar skyttur sem verða að vera góðar ef liðið ætlar að eiga möguleika á að verja titlana sem það vann í fyrra. Fram hefur líka misst Stellu Sigurðardóttur og Emmu Olsson og þær skilja eftir sig stór skörð, ekki síst í vörninni.
Miðað við leikinn gegn Val í Meistarakeppni HSÍ á laugardaginn á Fram-liðið enn nokkuð í land. En enginn skildi vanmeta þennan leikmannahóp og reyndasta þjálfara landsins.
Gengi Fram undanfarinn áratug
- 2021-22: deildarmeistari+Íslandsmeistari+bikarúrslit
- 2020-21: 2. sæti+undanúrslit
- 2019-20: Deildarmeistari+bikarmeistari
- 2018-19: 2. sæti+úrslit
- 2017-18: 2. sæti+Íslandsmeistari+bikarmeistari
- 2016-17: 2. sæti+Íslandsmeistari+bikarúrslit
- 2015-16: 3. sæti+undanúrslit
- 2014-15: 2. sæti+undanúrslit
- 2013-14: 4. sæti+átta liða úrslit
- 2012-13: 2. sæti+Íslandsmeistari+bikarúrslit
Lykilmaðurinn
Mörgum brá eflaust í brún að sjá Steinunni Björnsdóttur spila fyrir utan í leik Fram og Vals í Meistarakeppninni á laugardaginn. Það var þó vonandi bara neyðarúrræði því Steinunn nýtist Fram best sem línumaður. Til viðbótar er hún einn besti varnarmaður deildarinnar og líklega besti leiðtogi hennar. Ef Karen er heilinn í Fram-liðinu er Steinunn hjartað og það slær í takt við hana.
Félagaskiptamarkaðurinn
Komnar:
- Soffía Steingrímsdóttir frá Gróttu
- Hekla Rún Ámundadóttir frá Haukum
- Arna Sif Pálsdóttir frá Val
Farnar:
- Hildur Þorgeirsdóttir hætt
- Emma Olsson til Borussia Dortmund (Þýskalandi)
- Stella Sigurðardóttir hætt
- Margrét Björg Castillo til Gróttu
Markaðseinkunn (A-C): C
Fylgist með
Erna Guðlaug Gunnarsdóttir hefur verið viðloðandi aðallið Fram undanfarin ár án þess að hafa fengið neitt sérstaklega mörg tækifæri enda í baráttu við margreyndar landsliðskonur sem hafa reynslu úr atvinnumennsku. Erna hefur hins vegar verið í stóru hlutverki hjá U-liði Fram og sýnt að hún er eiginlega of góð fyrir Grill 66 deildina. Spurningin er hvort hún fái tækifæri til að stimpla sig almennilega inn í Olís-deildina í vetur og grípi það.
