Þetta er niðurstaða könnunar Seðlabanka Íslands, sem var framkvæmd í byrjun síðustu viku og fengust svör frá 24 markaðsaðilum, en samkvæmt henni búast þeir núna við meiri verðbólgu bæði til skamms og lengri tíma en áður. Í könnun bankans frá því í apríl töldu markaðsaðilar þannig að verðbólgan, sem hefur aukist stöðugt á síðustu mánuðum, yrði fimm prósent að ári liðnu.
Þá hafa langtímaverðbólguvæntingar jafnframt hækkað frá síðustu könnun og er búist við að verðbólga verði að meðaltali 3,8 prósent á næstu fimm árum. Verðbólguvæntingar til tíu ára hafa einnig hækkað og mælast um 3,5 prósent.
Þá gefur könnunin til kynna að markaðsaðilar vænti þess að gengi krónunnar hækki lítillega á næstu misserum og að gengi evru gagnvart krónu verði 138 krónur eftir eitt ár.
Næsti vaxataákvörðunarfundur peningastefnunefndar Seðlabankans fer fram miðvikudaginn í næstu viku en fastlega er gert ráð fyrir að vextir bankans, sem eru núna 4,75 prósent og hafa hækkað um 2,75 prósentur frá áramótum, muni þá hækka enn frekar.
Í könnun Seðlabankans kemur fram að miðað við miðgildi svara þá búist markaðsaðilar við því að meginvextir bankans hækki í 5,5 prósent á yfirstandandi fjórðungi og að þeir hækki enn frekar í framhaldinu og verði 6 prósent á fyrsta fjórðungi næsta árs.
Vextirnir muni hins vegar taka að lækka að einu ári liðnu og verða þá 5,5 prósent og eftir tvö ár verði þeir komnir niður í 4,5 prósent. Þetta eru hærri vextir en markaðsaðilar bjuggust við í könnun bankans frá því í apríl.
Eftir brattar vaxtahækkanir Seðlabankans að undanförnu – þeir hafa hækkað um 100 punkta í einu vetfangi á síðustu tveimur fundum peningastefnunefndar – telja færri markaðsaðilar en áður að taumhald peningastefnunnar sé of laust. Hlutfall þeirra er nú 67 prósent en var 79 prósent í síðustu könnun í apríl. Aðeins fjögur prósent svaraenda telur að taumhaldið sé of mikið.
