Veiði

Nýjar veiðitölur úr laxveiðiánum

Karl Lúðvíksson skrifar
Stefán með 97 sm laxinn sem veiddist í Ytri Rangá
Stefán með 97 sm laxinn sem veiddist í Ytri Rangá Harpa Hlín

Nýjar veiðitölur eru komnar úr laxveiðiánum og það er ljóst að Rangárnar koma til með að bera höfuð og herðar yfir aðrar ár í sumar.

Veiðin í Ytri Rangá var frábær í vikunni þegar heildarveiðin var um 500 laxar. Göngur í ána eru mjög góðar og það er mikið af laxi á flestum stöðum. Ytri er komin í 1707 laxa og það er nóg eftir af tímabilinu. Það má alveg reikna með því að hún geti farið í 3.500 til 4.000 laxa í sumar. Eystri Rangá er líka á mjög góðu róli en heildarveiðin í henni er komin í 1.322 laxa og þar eru göngur líka mjög góðar. Smálaxinn hefur verið að mæta í auknum mæli og kemur hann mjög vel haldinn úr sjó.

Í þriðja sæti á listanum er svo Þverá/Kjarrá með 992 laxa. Heildarveiðin þar í fyrra var 1.377 laxar svo það er alls ekkert ólíklegt að hún verði nálægt þeirri tölu í sumar sem þýðir að veiðin er svona nokkuð nálægt því sem kalla mætti meðalár. Norðurá er í fjórða sæti með 930 laxa en heildarveiði í fyrra upp á 1.431 lax. Norðurá er ekki mjög sterkt síðsumars en haldist hún áfram í góðu vatni fer hún engu að síður ansi nálægt 1.400 að okkar mati.

Urriðafoss er í fimmta sæti með 798 laxa og heildarveiði í fyrra upp á 823 laxa svo það verður að teljast meira en líklegt að veiðin þar nái 900 löxum í sumar. Þetta sumar er kannski ekkert met en það er alls ekki lélegt víða og í mörgum tilfellum stefnir í nokkuð betri tölur en í fyrra. Allur ágústmánuður er eftir og september líka í náttúrulegu ánum og haustið er oft ansi drjúgt þegar árnar eru í góðu vatni og veðrið gott.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.