Handbolti

Enn vinna íslensku stúlkurnar sem fara ósigraðar í 8-liða úrslit

Valur Páll Eiríksson skrifar
Elín Klara Þorkelsdóttir var markahæst í íslenska liðinu í kvöld.
Elín Klara Þorkelsdóttir var markahæst í íslenska liðinu í kvöld. ihf

Landslið Íslands í handbolta kvenna skipað leikmönnum 18 ára og yngri vann 25-22 sigur á Norður-Makedóníu í seinni leik sínum í milliriðli 1 á HM í Skopje í kvöld. Liðið vann því milliriðilinn og er enn taplaust á mótinu.

Ísland var öruggt með sæti í átta liða úrslitum HM fyrir leik en ljóst var að jafntefli eða sigur Íslands myndi tryggja þeim efsta sætið.

Leikur liðanna í kvöld var nokkuð jafn framan af en Ísland var þó alltaf skrefi á undan. Íslensku stúlkurnar skoruðu fyrsta mark leiksins og voru ávallt skrefi á undan. Þær leiddu með einu til þremur mörkum framan af hálfleiknum en um hann miðjan var staðan 9-6. 

Mest náði Ísland fjögurra marka forskoti, 12-8, en þriggja marka munur var í hálfleik, 13-10.

Ísland komst þá 16-11 yfir snemma í síðari hálfleik en heimakonur svöruðu með þremur mörkum í röð til að minnka muninn í 16-14. Aftur kom að áhlaupi Íslands sem komst í 18-14 en skömmu síðar var munurinn orðinn eitt mark, 18-17.

Áfram gekk leikurinn líkt og í fyrri hálfleik þar sem munurinn var á bilinu eitt til fjögur mörk en aldrei tókst Norður-Makedóníu að brúa bilið til fulls. Afar mikilvæg markvarsla úr vítakasti í stöðunni 24-22 fyrir Ísland þegar tvær mínútur voru eftir gerði að verkum að íslenska liðið var aldrei í mikilli hættu að missa sigurinn frá sér.

25-22 urðu lokatölur en ljóst er að Ísland mun mæta Hollandi í 8-liða úrslitunum. Þær hollensku lentu í öðru sæti riðils 3 eftir tap fyrir toppliði Suður-Kóreu í kvöld.

Tap heimakvenna þýðir að þær eru úr leik en sigur Svíþjóðar á Íran tryggði þær sænsku áfram með Íslandi.

Mörk Íslands:

Elín Klara Þorkelsdóttir 6, Inga Dís Jóhannsdóttir 6, Lilja Ágústsdóttir 4, Tinna Sigurrós Traustadóttir 4, Katrín Anna Ásmundsdóttir 3, Alfa Brá Hagalín Oddsdóttir 1, Thelma Melsteð Björgvinsdóttir 1.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.